কোন হ'ব ৰাজ্যিক বিজেপিৰ সভাপতি; চৰ্চাত মন্ত্ৰী যোগেন মহনৰ নাম মৰাণ, 14 এপ্ৰিল: লোকসভা নিৰ্বাচনৰ পাছতে মন্ত্ৰীসভাৰ সাল-সলনিৰ লগতে সলনি হ'ব পাৰে ৰাজ্যিক বিজেপিৰ সভাপতিৰ পদো ৷ বিভিন্ন সংবাদ মাধ্যমত এই সন্দৰ্ভত প্ৰচাৰ হোৱাৰ পাছতে চৰ্চালৈ আহিছে উজনিৰ মাহমৰা সমষ্টিৰ বিধায়ক তথা কেবিনেট মন্ত্ৰী যোগেন মহনৰ নাম ৷ সৰ্বানন্দ সোণোৱাল মন্ত্ৰীসভাৰ পৰাই ৰাজহ বিভাগৰ লগতে বহুকেইটা গুৰুত্বপূৰ্ণ বিভাগৰ দায়িত্ব এতিয়ালৈকে লৈ থকা যোগেন মহনৰ নাম চৰ্চালৈ অহাৰ পাছতে প্ৰতিক্ৰিয়া ব্যক্ত কৰিছে মন্ত্ৰীজনে ৷
শাসকীয় দলৰ সভাপতি পদ অতি সন্মানজনক পদ বুলি উল্লেখ কৰি মন্ত্ৰী যোগেন মহনে কয়, "দলে যিয়েই দায়িত্ব দিয়ে তেওঁ পালন কৰিবলৈ প্ৰস্তুত ৷ বিজেপি যিহেতু ৰাষ্ট্ৰীয় দল, দলৰ হাইকামাণ্ড আছে ৷ তদুপৰি মুখ্যমন্ত্ৰীৰ ওপৰত এই বিষয়টো নিৰ্ভৰ কৰিব ৷ অৱশ্যে এতিয়ালৈকে এই বিষয়ত দলৰ হাইকামাণ্ডে একো জনোৱা নাই ৷"
ইয়াৰোপৰি মহনে কয়, "যদি দলে কিবা এটা যোগ্যতা আছে বুলি ভাবে আৰু এইজনৰ নেতৃত্বত দল শক্তিশালী হ’ব, তেন্তে মইটো হেলাৰঙে দায়িত্ব লম, একো ডাঙৰ কথা নহয় ৷" সমান্তৰালভাৱে, যিহেতু সমুখত নিৰ্বাচন আছে নিৰ্বাচনৰ প্ৰচাৰতহে যোগেন মহন ব্যস্ত বুলি উল্লেখ কৰে মন্ত্ৰী যোগেন মহনে ৷
উল্লেখ্য যে, লোকসভা নিৰ্বাচনৰ বাবে শাসকীয় বিজেপিৰ বৃদ্ধি পাইছে নিৰ্বাচনী তৎপৰতা ৷ প্ৰতিগৰাকী দলীয় নেতা-কৰ্মীয়ে সমষ্টিয়ে সমষ্টিয়ে তুংগত কৰি তুলিছে নিৰ্বাচনী প্ৰচাৰ অভিযান ৷ একেদৰে, মাহমৰা আৰু জজলিকে ধৰি যোৰহাট লোকসভা সমষ্টিৰ বিভিন্ন স্থানত যোৰহাট লোকসভা সমষ্টিৰ বিজেপিৰ মিত্ৰজোঁটৰ প্ৰাৰ্থী তপন কুমাৰ গগৈৰ বাবে মহনে চলাইছে নিৰ্বাচনী প্ৰচাৰ ৷ উন্নয়নৰ যাত্ৰা অব্যাহত ৰাখিবলৈ যোৰহাট লোকসভা সমষ্টিবাসীক গগৈক জয়যুক্ত কৰিবলৈ আহ্বান জনায় মন্ত্ৰী যোগেন মহনে ৷
লগতে পঢ়ক:তপন কুমাৰ গগৈক ন দৰা আখ্যা মন্ত্ৰী যোগেন মহনৰ - Lok Sabha Election 2024
