মাজুলী, ১৭ অক্টোবৰ : আজি কাতি বা কঙালী বিহু । সেউজী শস্যৰ শ্ৰীবৃদ্ধি কামনাৰে ৰাজ্যৰ প্ৰতিটো প্ৰান্তত আজি চহা অসমীয়াই পালন কৰিব কাতি বিহু । তুলসীৰ তলত চাকি জ্বলাই আবাহন কৰিব মা লক্ষ্মীক ৷ বিহুৰ বাবে ব্যস্ততা বাঢ়িছে ৰাজ্যবাসীৰ ৷
ৰাজ্যৰ অন্যান্য প্ৰান্তৰ দৰে মাজুলীতো কাতি বিহু পালন কৰিবলৈ যো-যা চলোৱা হৈছে । মাজুলীত কাতি বিহুটিক শাৰদীয় মুখ্য উৎসৱ হিচাপে গণ্য কৰা হয় । ৰাসোৎসৱ, পালনামৰ দৰেই কাতি বিহু মুখ্য উৎসৱ মাজুলীৰ । কাতি বিহু উপলক্ষে মাজুলীৰ বিশেষ আকৰ্ষণ হৈছে আকাশ বন্তি ।
ঐতিহ্য পৰম্পৰা ৰক্ষা কৰি মাজুলীৰ আউনীআটী সত্ৰ, দক্ষিণপাট সত্ৰ, গড়মূৰ সত্ৰত আকাশ বন্তি প্ৰজ্বলন কৰা হয় । বিগত বৰ্ষসমূহৰ দৰে এই বৰ্ষতো ঐতিহাসিক আউনীআটী সত্ৰত ৩৭১ বছৰীয়া পৰম্পৰাৰে কাতি বিহু উদযাপন হ’ব । সত্ৰৰ প্ৰতিষ্ঠা কালৰে পৰা চলি অহা এই পৰম্পৰা ৰক্ষা কৰি সত্ৰৰ কীৰ্তন ঘৰৰ নিচেই কাষতে ২১ যোৰা আকাশ বন্তি প্ৰজ্বলন কৰে । গোটেই কাতি মাহটোতে এই ২১ জোৰা আকাশ বন্তি প্ৰজ্বলিত হৈ থাকিব আউনিআটি সত্ৰৰ প্ৰাংগণত ।