তিনিচুকীয়া,২২ আগষ্ট: শিৱসাগৰৰ ঘটনাৰ পাছতো শিক্ষা লোৱা নাই একাংশ অনা অসমীয়াই । বুধবাৰে তিনিচুকীয়াত ১৪ টাকৈ দল-সংগঠনে গুপ্তা মটৰ্চত নামৰ এখন ব্যৱসায়িক প্ৰতিষ্ঠানত তলা লগোৱাৰ পাছত নিশা পুনৰ সংঘটিত হয় আন এটা ঘটনা । নিশা তিনিচুকীয়া চহৰৰ শ্বহীদ খৰ্গেশ্বৰ পথত এজন অসমীয়া যুৱকক দলবদ্ধ আক্ৰমণ কৰে ৭-৮ জনীয়া এটা অনা অসমীয়া লোকৰ দলে ৷ আক্ৰমণত গুৰুতৰভাৱে আহত হয় ৰিদীপ ডেকা নামৰ যুৱকজন । পৰৱৰ্তী সময়ত লোকজনক তিনিচুকীয়া অসামৰিক চিকিৎসালয়ত ভৰ্ত্তি কৰা হয় আৰু মূৰত প্ৰায় ৭ টাকৈ চিলাই কৰিব লগা হয় ৷
অভিযোগ অনুসৰি, বাট এৰি দিবলৈ কোৱাৰ বাবেই সংঘটিত হয় উক্ত ঘটনা । পৰৱৰ্তী সময়ত যুৱকজনৰ পৰিয়ালে তিনিচুকীয়া সদৰ আৰক্ষী থানাত দাখিল কৰে এজাহাৰ । এজাহাৰ দাখিল কৰাৰ পাছতে ভুক্তভোগী যুৱকজনৰ বাসগৃহত তিনিচুকীয়া আৰক্ষীৰ এটা দল উপস্থিত হৈ সমগ্ৰ ঘটনাৰ সন্দৰ্ভত তদন্ত আৰম্ভ কৰে । ইতিমধ্যে উক্ত ঘটনাৰ স’তে জড়িত অজয় সিং নামৰ এজন যুৱকক আটক কৰিছে বুলি জানিবলৈ দিয়ে অতিৰিক্ত আৰক্ষী অধীক্ষক মৃন্ময় দাসে ।