তিনিচুকীয়া, 21 আগষ্ট:শিৱসাগৰৰ ঘটনাই সংবাদ শীৰ্ষ দখল কৰি থকাৰ সময়তে পুনৰ তিনিচুকীয়াত সংঘটিত হ’ল অনুৰূপ ঘটনা ৷যাৰ বাবেঅনা-অসমীয়া বণিয়াৰ দৌৰাত্ম্যৰ বিৰুদ্ধে তিনিচুকীয়াত বুধবাৰে 14 টাকৈ জাতীয়-জনগোষ্ঠীয় দল-সংগঠনৰ নেতৃত্বই ক্ষোভ উজাৰি তলা ওলোমালে অনা-অসমীয়া বণিয়াৰ গুপ্তা মটৰ্চ নামৰ ব্যৱসায়িক প্ৰতিষ্ঠানখনত ৷
জানিব পৰা মতে, স্থানীয় এগৰাকী যুৱকে তেওঁৰ প্ৰয়োজনীয় সামগ্ৰী ক্ৰয় কৰিবলৈ যোৱাৰ সময়তে তিনিচুকীয়া মাকুম পথৰ গুপ্তা মটৰ্চ নামৰ ব্যৱসায়িক প্ৰতিষ্ঠানখনৰ গৰাকীৰ সৈতে বাক-বিতণ্ডাত লিপ্ত হয় আৰু ইয়াৰ পাছত যুৱকজনক অশ্লীল গালি-গালাজ গুপ্তা মটৰ্চ নামৰ ব্যৱসায়িক প্ৰতিষ্ঠানখনৰ গৰাকীয়ে কৰে বুলি অভিযোগ তুলিছে ৷ এই সন্দৰ্ভত স্থানীয় জাতীয়-জনগোষ্ঠীয় দল-সংগঠনবোৰে অৱগত হোৱাৰ পাছতে জাঙুৰ খাই উঠে আৰু মঙলবাৰে সন্ধিয়া 14 টাকৈ জাতীয়-জনগোষ্ঠীয় দল-সংগঠনে একত্ৰিত হৈ গুৰুত্বপূৰ্ণ বৈঠকত মিলিত হয় ৷
তিনিচুকীয়াৰ দল-সংগঠনবোৰে প্ৰথমতে প্ৰতিষ্ঠানখনৰ গৰাকীক ভুলৰ ক্ষমা বিচাৰিবলৈ আধা ঘণ্টা সময় দিছিল যদিও ক্ষমা নোখোজাত দল-সংগঠনৰ বিষয়ববীয়াসকলে প্ৰতিষ্ঠানখনত উপস্থিত হৈ তিনিচুকীয়া আৰক্ষীৰ উপস্থিতিত গুপ্তা মটৰ্চত তলা লগাই দিয়ে বুলি জানিব পৰা গৈছে ৷
ইয়াৰ পাছতে প্ৰতিষ্ঠানখনৰ গৰাকীক ক্ষমা খুজিবলৈ 24 ঘণ্টা সময় নিৰ্ধাৰণ কৰি দিয়ে সংগঠনকেইটাই ৷ 24 ঘণ্টাৰ ভিতৰত যদি ক্ষমা নিবিচাৰে তেন্তে যিকোনো কাৰ্যসূচী ল’বলৈ বাধ্য হ’ব বুলি সকীয়নি প্ৰদান কৰে স্থানীয় 14 টাকৈ দল-সংগঠনে ৷