যোৰহাট, ২০ জানুৱাৰী:অসম কৃষি বিশ্ববিদ্যালয়ৰ উদ্যোগত বিশ্ববিদ্যালয়ৰ যোৰহাটস্থিত মূল চৌহদৰ আই চি আৰ ফাৰ্মত আজি এখন বৃহৎ কৃষি মেলা অনুষ্ঠিত হয় । ৰাজ্যৰ বিভিন্ন প্ৰান্তৰ সহস্ৰাধিক কৃষকে অংশগ্ৰহণ কৰা এই বৃহৎ কৃষি মেলাত অসম কৃষি বিশ্ববিদ্যালয়ৰ ১৭ টা বিভাগে অংশগ্ৰহণ কৰে । এই মেলাত কৃষি কাৰিকৰী প্ৰদৰ্শন, উদ্যান শস্যৰ প্ৰদৰ্শনী আৰু প্ৰতিযোগিতাৰ লগতে কৃষি যন্ত্ৰপাতি আৰু কাৰিকৰী কৌশলৰো প্ৰদৰ্শন কৰা হয় । লগতে নিৰ্বাচিত কৃষক উৎপাদক কোম্পানী আৰু কৃষক উৎপাদক সংস্থাৰ প্ৰতিনিধিৰ উপৰি বিদ্যালয়-মহাবিদ্যালয়ৰ শিক্ষাৰ্থীয়েও অংশগ্ৰহণ কৰে এই বৃহৎ কৃষি মেলাত ।
তদুপৰি উদ্যান শস্য প্ৰদৰ্শনী আৰু প্ৰতিযোগিতাত ব্যক্তিগত অংশগ্ৰহণকাৰীৰ লগতে চৰকাৰী তথা ব্যক্তিগত প্ৰতিষ্ঠান আৰু নাৰ্চাৰীয়ে অংশগ্ৰহণ কৰে । এই বৃহৎ কৃষি মেলাত ফুল, ফল, শাক-পাচলি, গুটি,ফুলৰ ফুলদানি আদি বিভিন্ন কৃষিজাত সামগ্ৰী প্ৰদৰ্শিত হয় । বৃহৎ কৃষি মেলাৰ লগত সংগতি ৰাখি বিদ্যালয় আৰু মহাবিদ্যালয়ৰ পৰ্যায়ত এখন কৃষি কুইজ প্ৰতিযোগিতাও অনুষ্ঠিত হয় ।