শ্ৰীনগৰ : জম্মু আৰু কাশ্মীৰৰ বিধানসভা অধিবেশনৰ মাজতে হুলস্থূলীয়া পৰিৱেশ । অনুচ্ছেদ ৩৭০ আৰু বিশেষ মৰ্যাদা প্ৰস্তাৱক লৈ উত্তাল হৈ পৰে বিধানসভাৰ মজিয়া । বিষয়টোক লৈ বিধায়কসকলৰ দুই পক্ষৰ মাজত প্ৰচণ্ড হতাহতি হোৱা দেখা যায় । পৰিস্থিতি ইমানে বেয়া হয় যে অধ্যক্ষই সদন স্থগিত ৰাখিবলৈ বাধ্য হয় । বুধবাৰে পূৰ্বৰ দৰে ৰাজ্যৰ বিশেষ মৰ্যাদা প্ৰদানৰ বাবে জম্মু-কাশ্মীৰ বিধানসভাত প্ৰস্তাৱ গ্ৰহণ কৰা হৈছিল । বিজেপি বিধায়কসকলৰ তীব্ৰ বিৰোধিতাৰ মাজতো এই প্ৰস্তাৱ গৃহীত হৈছিল ।
জম্মু আৰু কাশ্মীৰৰ বিধানসভাত প্ৰতিবাদ
ইফালে বৃহস্পতিবাৰে সদনৰ কাম-কাজ আৰম্ভ হোৱাৰ পিছতে বিজেপি নেতা তথা বিৰোধী দলৰ দলপতি সুনীল শৰ্মাই প্ৰস্তাৱটোক অবৈধ বুলি অভিহিত কৰাৰ লগে লগে হুলস্থূলীয়া পৰিৱেশৰ সৃষ্টি হয় । অনুচ্ছেদ ৩৭০ আৰু ৩৫এ পুনৰুদ্ধাৰৰ দাবীৰে হাতত এখন বেনাৰ লৈ এআইপি বিধায়ক খুৰ্ছিদ শ্বেইখে সদনৰ ভিতৰতে প্ৰতিবাদ সাব্যস্ত কৰে ।
যাৰ ফলত বিজেপিৰ বিধায়কসকল ক্ষুব্ধ হৈ পৰে আৰু তেওঁলোকেও প্ৰতিবাদ আৰম্ভ কৰে । নেতাগৰাকীৰ পৰা বেনাৰখন কাঢ়ি লৈ ফালি পেলায় । প্ৰতিবাদৰ মাজতে বিজেপি বিধায়কসকলে পিডিপি, পিচি আৰু এআইপি নেতাসকলৰ সৈতে সংঘৰ্ষত লিপ্ত হয় । পৰিস্থিতি অৱনমিত হোৱাৰ লগে লগে অধ্যক্ষই সদন ১৫ মিনিটৰ বাবে স্থগিত ৰাখে ।