పోలీసులే లంచం అడిగారు...అరెస్టయ్యారు

కామారెడ్డి  జిల్లా మాచారెడ్డి మండలానికి చెందిన సింహాచలం వే బిల్ తీసుకుని సిరిసిల్ల నుంచి టిప్పర్​లో ఇసుకను కొనుగోలు చేసి తీసుకెళ్తున్నాడు. ఈ క్రమంలో ఎల్లారెడ్డిపేట సీఐ లింగమూర్తి టిప్పర్​ను మాచారెడ్డి మండలం లచ్చ పేట వద్ద పట్టుకున్నారు. అనంతరం గంభీరావుపేట ఠాణా ఎస్సై అనిల్​కు గత నెల 19న అప్పజెప్పారు. మరుసటి రోజు గంభీరావుపేట ఎస్సై అనిల్​కు... సింహాచలం కలవడం వల్ల డబ్బులు రెడీ చేసుకోండని సదరు ఎస్ఐ చెప్పినట్లు ఆయన స్పష్టం చేశారు.

రెడ్ హ్యాండెడ్​గా పట్టుకున్న ఏసీబీ...

మరుసటి రోజు వచ్చిన సింహాచలంను పోలీసు అధికారులు రూ.20 వేలు లంచం డిమాండ్ చేశారు. ఈ క్రమంలో సింహాచలం... ఏసీబీ అధికారులను ఆశ్రయించాడు. ఏసీబీ అధికారుల సూచన మేరకు శుక్రవారం గంభీరావుపేట ఠాణా కానిస్టేబుల్ కనకరాజుకు 10,000  ఇస్తుండగా రెడ్ హ్యాండెడ్​గా ఏసీబీ పట్టుకుంది. రాజును పట్టుకుని విచారించగా... ఎస్సై తీసుకోమంటేనే తాను తీసుకున్నానని వెల్లడించాడు.

ఈ మేరకు ఎస్​ఐ అనిల్​ను  విచారించగా సీఐ తీసుకోమన్నాడని తెలిపారు. సదరు పోలీస్ అధికారులను విచారించగా... నేరం రుజువైంది. ఎల్లారెడ్డిపేట సీఐ లింగమూర్తి, గంభీరావుపేట ఎస్సై అనిల్, కానిస్టేబుల్ కనకరాజులను ఏసీబీ అదుపులోకి తీసుకుంది. కరీంనగర్​ ఏసీబీ కోర్టులో హాజరు పరుస్తామని ఏసీబీ డీఎస్పీ భద్రయ్య పేర్కొన్నారు.