అరంగేట్ర టెస్టులోనే 5 వికెట్లు.. అదే సిరీస్లో శతకంతో పాటు 'ప్లేయర్ ఆఫ్ ద సిరీస్'... వేగంగా 300 వికెట్లు తీసిన మైలురాయి.. ఈ రికార్డులు సాధించింది ఎవరో కాదు.. టీమిండియా స్టార్ స్పిన్నర్ రవిచంద్రన్ అశ్విన్. ఈ దశాబ్దంలో అంతర్జాతీయ మ్యాచ్ల్లో అత్యధిక వికెట్లు (564) తీసిన బౌలర్గా అశ్విన్ రికార్డు సృష్టించాడు.
అశ్విన్.. అత్యధిక వికెట్లు
2010 జనవరి నుంచి ఇప్పటివరకు మూడు ఫార్మాట్లలో కలిపి మొత్తం 564 వికెట్లు తీసి అగ్రస్థానంలో ఉన్నాడు అశ్విన్. టెస్టుల్లో 362, వన్డేల్లో 150, టీ20ల్లో 52 వికెట్లు తీశాడు. జేమ్స్ అండర్సన్ 535, స్టువర్ట్ బ్రాడ్ 525 వికెట్లతో తర్వాతి స్థానాల్లో ఉన్నారు. కివీస్ బౌలర్ టిమ్ సౌథి, ట్రెంట్ బౌల్ట్ కూడా టాప్-5లో చోటు దక్కించుకున్నారు.
అరంగేట్ర టెస్టులోనే 5 వికెట్లు..
2011లో వెస్టిండీస్పై అరంగేట్రం చేసినప్పటి నుంచి అశ్విన్ వికెట్ల దాహం ఇప్పటి వరకు కొనసాగుతూనే ఉంది. ముఖ్యంగా పొడి పిచ్లపై తన స్పిన్ మయాజాలంతో బ్యాట్స్మెన్ను తికమక పెడతాడు. అరంగేట్ర టెస్టులో 5 వికెట్లు తీసిన ఏడో భారత క్రికెటర్గా ఈ చెన్నై బౌలర్ రికార్డు సృష్టించాడు. అంతేకాకుండా అదే సిరీస్లో శతకంతో పాటు 'ప్లేయర్ ఆఫ్ ద సిరీస్' అవార్డు కూడా దక్కించుకున్నాడు.
వేగంగా 300 వికెట్ల మైలురాయి
టెస్టుల్లో వేగంగా 300 వికెట్ల మైలురాయిని అందుకున్న బౌలర్గా అశ్విన్ ఘనత సాధించాడు. 70 టెస్టుల్లో 25.37 సగటుతో 362 వికెట్లు తీశాడు. ఇటీవల దక్షిణాఫ్రికాతో జరిగిన టెస్టు సిరీస్లో ఏడాది విరామం తర్వాత జట్టులోకి వచ్చి అద్భుత ప్రదర్శన చేశాడు. తొలి టెస్టులో 7/145 గణాంకాలతో 27వ సారి 5 వికెట్లు తీసిన ఘనత సాధించాడు.
పరిమిత ఓవర్ల క్రికెట్కు దూరం
భారత టెస్టు జట్టులో రెగ్యులర్ బౌలర్గా ఉన్న అశ్విన్.. పరిమిత ఓవర్ల క్రికెట్ ఆడట్లేదు. 2017లో వెస్టిండీస్ పర్యటనలో అశ్విన్ స్థానంలో కుల్దీప్ యాదవ్, యజువేంద్ర చాహల్ను తీసుకుంది జట్టు యాజమాన్యం. అశ్విన్ చివరగా 2017 జూన్లో విండీస్తో ఆడాడు.
2014లో భారత ప్రభుత్వం 'అర్జున' అవార్డుతో అశ్విన్ను సత్కరించింది. 2016లో ఐసీసీ 'క్రికెటర్ ఆఫ్ ద ఇయర్', ఐసీసీ 'టెస్టు క్రికెటర్ ఆఫ్ ద ఇయర్'గా ఎంపికయ్యాడు. ఈ దశాబ్దపు అత్యుత్తమ టెస్టు జట్టులో విరాట్ కోహ్లీతో పాటు రవిచంద్రన్ అశ్విన్ చోటు దక్కించుకున్నాడు. విస్డెన్ టెస్టు టీమ్ ఈ జట్టును ప్రకటించింది.
ఇదీ చదవండి: అనారోగ్యంతో స్టోక్స్ తండ్రి.. సఫారీలతో తొలి టెస్టుకు అనుమానం
