అంతర్జాతీయంగా అమెరికా- చైనా వాణిజ్య యుద్ధం, ఆర్థిక మాంద్యం వంటి ఎన్నో అవరోధాలు ఉన్నా.. దేశీయ స్టాక్ మార్కెట్లు ఈ ఏడాది సానుకూల వృద్ధిని నమోదు చేశాయి. ఇటీవల వాణిజ్య యుద్ధానికి తెరపడినా.. ఆర్థిక వృద్ధి మందగమనం కొనసాగుతున్నట్లు గణాంకాలు స్పష్టం చేస్తున్నాయి.
కొన్ని సందర్భాల్లో సూచీలు ఆందోళనకర సంకేతాలిచ్చినా.. పడి లేచిన కెరటాల్లా మళ్లీ లాభాల్లో కొనసాగాయి. ముఖ్యంగా ఈ ఏడాది సార్వత్రిక ఎన్నికల్లో మరోసారి మోదీ.. ప్రభుత్వాన్ని ఏర్పాటు చేయడం కారణంగా రాజకీయ పరంగా సుస్థిరత ఏర్పడింది. ఫలితంగా ఆటుపోట్లు ఉన్నా మార్కెట్లు ముందుకే పయనించాయి. ఆర్థిక మందగమనం నేపథ్యంలో కేంద్రం ఉద్దీపనలు ప్రకటించడమూ మార్కెట్లకు కలిసొచ్చింది.
ఈ ఏడాదిలో సూచీలు సాగాయిలా..
36,254.57 పాయింట్లతో ఏడాది తొలి సెషన్ను ప్రారభించిన సెన్సెక్స్.. ప్రస్తుతం 40,575.14 పాయింట్ల వద్ద ఉంది (డిసెంబర్ 27 నాటికి). ఈ లెక్కన ఇప్పటి వరకు సెన్సెక్స్ 4,320.57 పాయింట్లు పెరిగింది.
నిఫ్టీ ఈ ఏడాది తొలి సెషన్ 10,910.10 వద్ద ప్రారంభించింది.. ప్రస్తుతం ఈ సూచీ 12,145.80 వద్ద ఉంది (డిసెంబర్ 27 నాటికి). ఇప్పటి వరకు నిఫ్టీ మొత్తం 1,235.7 పాయింట్లు బలపడింది.
కీలక స్థాయిలు ఇవే..
ఈ ఏడాదిలోనే సెన్సెక్స్ 39,000, 40,000, 41,000 మార్క్లను దాటింది. ప్రధానంగా సార్వత్రిక ఎన్నికల ఫలితాల్లో భాజపాకు స్పష్టమైన మెజారిటీ వస్తున్నట్లు తెలియడం వల్ల తొలిసారి మే 23న సెన్సెక్స్ 40,000 మార్క్ను తాకింది. నిఫ్టీ 12,000 మార్క్ను తాకింది. మోదీ 2.0 ప్రభుత్వం రెండో సారి ప్రభుత్వాన్ని ఏర్పాటు చేయడం కారణంగా కొన్ని రోజులు ఆ సానుకూలతలు కొనసాగాయి.
ఈ ఏడాది మొత్తం మీద ఇంట్రాడేలో.. సెన్సెక్స్ సెప్టెంబర్ 20న 2163 పాయింట్లకు పైగా లాభాన్ని గడించింది. నిఫ్టీ 655 పాయింట్లకు పైగా లాభాన్ని నమోదు చేసింది. కార్పొరేట్ పన్ను 10 శాతం మేర తగ్గిస్తూ ఆర్థిక మంత్రిత్వ శాఖ నిర్ణయం తీసుకోవడం ఇందుకు కారణం. ఇదే రోజు బీఎస్ఈ లిస్టెడ్ కంపెనీల్లో మదుపరుల సంపద రూ.7 లక్షల కోట్లు పెరిగింది.
నష్టాల పరంగా చూస్తే సెన్సెక్స్ బడ్జెట్ మరుసటి రోజు జులై 8న 793 పాయింట్లు, జీడీపీ రేటు తగ్గుదల ఆందోళనలతో సెప్టెంబర్ 3న 770 పాయింట్లు క్షీణించింది. సెప్టెంబర్ 3న నిఫ్టీ 225 పాయింట్లకు పైగా నష్టపోయింది.
ఈ షేర్లు భళా..
ముకేశ్ అంబానీకి చెందిన రిలయన్స్ ఇండస్ట్రీస్ ఎం-క్యాప్ ఈ ఏడాదే రూ.10 లక్షల కోట్ల మార్క్ను దాటింది. ఈ కారణంగా దేశంలోనే అత్యంత విలువైన సంస్థగా నిలిచింది.
ఈ రేసులో టీసీఎస్ కాస్త వెనుకంజలో ఉండి.. రూ.8 లక్షల కోట్లకు పైగా ఎం-క్యాప్తో రెండో స్థానంలో నిలిచింది.
ఇటీవలే ప్రైవేట్ రంగ హెచ్డీఎఫ్సీ బ్యాంక్ రూ.7 లక్షల కోట్ల ఎం-క్యాప్ను సాధించింది. ఈ మార్క్ను అందుకున్న మూడో భారత సంస్థగా నిలిచింది. బ్యాంకింగ్ రంగంలో రూ.7 లక్షల కోట్ల మార్కెట్ క్యాపిటల్ను అందుకున్న తొలి భారతీయ బ్యాంకు ఇదే కావడం విశేషం.
మొత్తం మీద ఈ ఏడాది బజాజ్ ఫినాన్స్, భారతీ ఎయిర్టెల్, బజాజ్ ఫిన్సర్వ్, ఐసీఐసీఐ బ్యాంకు, కోటక్ మహీంద్రా బ్యాంకు షేర్లు భారీగా వృద్ధి చెందాయి.
ఈ షేర్లు డీలా..
జెట్ ఎయిర్వేస్ షేర్లు ఈ ఏడాది భారీగా పతనమయ్యాయి. ఈ షేర్లు ఇప్పటి వరకు 90 శాతం మేర క్షీణించాయి. ప్రస్తుతం ఈ సంస్థను విక్రయించే పనుల్లో ఉన్నారు రుణదాతలు. జెట్ ఎయిర్ సహా పలు మధ్య చిన్న తరహా షేర్లూ ఈ ఏడాది మదుపరులకు అంతగా లాభాలు సృష్టించలేకపోయాయి.
మొత్తం మీద ఎస్ బ్యాంకు, హెచ్సీఎల్టెక్, ఇండియా బుల్స్ హౌసింగ్, జీ ఎంటర్టైన్మెంట్ షేర్లు ఈ ఏడాది భారీ నష్టాలను మూటగట్టుకున్నాయి.
ఇదీ చూడండి:కొత్త సంవత్సరంలో తగ్గనున్న కూరగాయల ధరలు!
