దేశంలోనే తొలిసారిగా దిల్లీలో శాస్త్రీయ ఉద్యానం

దిల్లీ కేషోపుర్​లోని ఉద్యానంలో ప్రతి మొక్కను ఒక్కో భారతీయ శాస్త్రవేత్తకు అంకితమిచ్చారు. వాటిపై ఓ బార్​కోడ్​ ఏర్పాటు చేసి శాస్త్రవేత్తల వివరాలు పొందుపరిచారు. ఈ కోడ్​ను స్కాన్​ చేస్తే సదరు శాస్త్రవేత్త పూర్తి వివరాలు మనకు తెలుస్తాయి. ఫలితంగా దేశంలోనే తొలి వైజ్ఞానిక ఉద్యానంగా ఇది రూపుదిద్దుకోనుంది.

డిజిటల్​ ఇండియా​లో భాగంగా నూతన కార్యక్రమానికి శ్రీకారం చుట్టారు దిల్లీ కేషోపుర్​ ఉద్యాన నిర్వాహకులు. అందులో నాటిన మొక్కలకు భారతీయ శాస్త్రవేత్తల పేర్లతో నామకరణం చేశారు. ఆ మొక్కలపై బార్​కోడ్​ను ఏర్పాటు చేశారు. ఆ కోడ్​ను స్కాన్​చేయడం వల్ల సదరు శాస్త్రవేత్త పూర్తి వివరాలు మనకు లభిస్తాయి.

ఈ కార్యక్రమాన్ని కేషోపుర్​ కార్పొరేషన్​ కౌన్సిలర్​ స్వేత్​ సైనీ.. ప్రముఖుల సమక్షంలో ఘనంగా ప్రారంభించారు. ఫలితంగా భారతదేశంలోనే తొలి వైజ్ఞానికుల ఉద్యానంగా పేరు సంపాదించింది. గతేడాది ప్రధాని నరేంద్రమోదీ జన్మదినం సందర్భంగా ఈ ఉద్యానాన్ని ఏర్పాటు చేశారు నిర్వాహకులు. మోదీ 69 ఏళ్లు పూర్తి చేసుకున్నందుకు గుర్తుగా 69 మొక్కలను నాటారు.

ఏటా ఒక మొక్క

ఇక మీద మోదీ ప్రతి పుట్టిన రోజున ఈ శాస్త్రీయ ఉద్యానంలో ఓ మొక్కను నాటాలని నిర్ణయించారు. అలా నాటిన ప్రతి మొక్కపై బార్​కోడ్​ను అమర్చి... ఓ భారతీయ శాస్త్రవేత్తకు అంకితమిస్తారు. భారతీయ శాస్త్రవేత్తల గురించి ప్రజలు తెలుసుకునేందుకు, డిజిటల్ ఇండియాను ముందుకు తీసుకెళ్లేందుకు ఈ చర్య ఉపకరిస్తుందని పలువురు భావిస్తున్నారు.

ఇదీ చూడండి : పాక్​-చైనా యుద్ధ విన్యాసాల నేపథ్యంలో 'విక్రమాదిత్య' మోహరింపు