ఆడుతూ పాడుతూ గడపాల్సిన వయసులోనే దేశ సేవవైపు అడుగులేస్తున్నాడు.. ఉత్తర్ప్రదేశ్ ఆగ్రాకు చెందిన తొమ్మిదేళ్ల దేవ్ ప్రసాద్. దేశం, సైనికులంటే చిన్ననాటి నుంచే అమితమైన ప్రేమ పెంచుకున్న దేవ్ దేశ రక్షణలో ప్రాణాలర్పించిన సైనికులకు సలాం చేస్తూ వారి కుటుంబాల బాగోగులు తెలుసుకునేందుకు యాత్ర చేపట్టాడు. ఇప్పటికే 40 వేల కిలోమీటర్లు ప్రయాణించి..1500లకు పైగా అమరవీరుల కుటుంబాలను కలిశాడు.
పెద్దయ్యాక సైన్యంలో చేరి దేశాన్ని కాపాడలన్నదే దేవ్ లక్ష్యం. అందుకే ఇప్పటి నుంచే.. సైనిక దుస్తులు ధరించి, దేశ సేవవైపు అడుగులు వేస్తున్నాడు.
ముంబయిలో 2008లో నవంబర్ 26న తాజ్హోటల్లో జరిగిన బాంబు దాడి యావత్ దేశాన్ని కలవరపరచింది. ఆ ఘటనలో ప్రజల ప్రాణాలు కాపాడేందుతు తన ప్రాణాలర్పించిన అమరవీరుడు టాకా రామ్ అంబాలేను కలిసేందుకు మహారాష్ట్రకు వచ్చాడు దేవ్.
"దేశం కోసం అమరులైన జావాన్ల ఇంటికెళ్లి జెండా పెడతాను. ఇప్పటివరకు 1563 గ్రామాల్లో జావాన్ల కుటుంబాలను కలిశాను."
-దేవ్ ప్రసాద్.
అమరవీరుల కుటుంబాలను కలిసే ఈ ప్రయాణంలో దేవ్కు తోడుగా అతని తండ్రి సతీష్ ప్రసాద్ నిలుస్తున్నారు. సతీష్ వృత్తి పరంగా ఉపాధ్యాయుడే అయినా.. పాఠశాలకు సెలవులు ఉన్నప్పుడు మాత్రం తన కొడుకు సంకల్పాన్ని ముందుకు తీసుకెళ్తున్నారు.
"ఆగ్రాలోని ఖందోళీ గ్రామం నుంచి వచ్చాం. ముంబయిలో తాజ్ హోటల్పై జరిగిన దాడుల్లో పలువురు సైనికులు ప్రాణలర్పించారు. ఆ వీర జవాన్ల కుటుంబాలను కలిసి వారికి నమస్కరించడానికే ముంబయి వచ్చాం. ఈ దేశాన్ని, ముంబయి నగరాన్ని ఆ అమరులే కాపాడారు."
-సతీష్ ప్రసాద్, దేవ్ తండ్రి
ఇదీ చదవండి:రైల్వేస్టేషన్లో కానిస్టేబుల్ అభ్యర్థుల హల్చల్!
