গুৱাহাটী, ৩০ এপ্ৰিল : কেন্দ্ৰীয় গৃহমন্ত্ৰী অমিত শ্বাহে মঙলবাৰে কংগ্ৰেছৰ বিৰুদ্ধে তেওঁৰ লগতে আন বিজেপি নেতাৰ ভুৱা ভিডিঅ’ বিয়পাই দিয়াৰ অভিযোগত তীব্ৰ ক্ষোভ প্ৰকাশ কৰি কয় যে কংগ্ৰেছে হতাশাৰ বাবে এনে কাম কৰিবলৈ চেষ্টা কৰিছে ৷
মঙলবাৰে গুৱাহাটীৰ বিজেপিৰ ৰাজ্যিক সদৰ বাজপেয়ী ভৱনত সংবাদমেল সম্বোধন কৰি শ্বাহে কয়, “তেওঁলোকৰ হতাশা ইমানেই নিম্ন স্তৰত উপনীত হৈছে যে তেওঁলোকে মোৰ আৰু আন একাংশ বিজেপি নেতাৰ ভুৱা ভিডিঅ’ বনাই ৰাজহুৱা কৰাৰ আশ্ৰয় লৈছে । আনকি মুখ্যমন্ত্ৰী আৰু দলৰ ৰাজ্যিক সভাপতি পৰ্যায়ৰ লগতে আন নেতাসকলেও সেই ভিডিঅ’বোৰ ফৰৱাৰ্ড কৰিছে । ভাগ্য ভাল যে তেতিয়া মই কোৱা কথাবোৰো ৰেকৰ্ড কৰা হৈছিল আৰু সেইবোৰ প্ৰমাণ হিচাপে উপস্থাপন কৰিলো, যাতে সকলোৰে সন্মুখত কথাবোৰ স্পষ্ট হৈ পৰে আৰু এতিয়া এজন জ্যেষ্ঠ কংগ্ৰেছ নেতা অপৰাধমূলক অপৰাধৰ সন্মুখীন হৈছে । ই তেওঁলোকৰ হতাশাৰ স্পষ্ট চিন ।”
কংগ্ৰেছ দল আৰু নেতা ৰাহুল গান্ধীক শ্বাহে লক্ষ্য কৰি কয়, “ৰাহুল গান্ধীয়ে কংগ্ৰেছৰ দায়িত্ব গ্ৰহণ কৰাৰ পৰা ৰাজনীতিৰ স্তৰ তললৈ নমাই আনিবলৈ চেষ্টা কৰিছে । তেওঁৰ নেতৃত্বত কংগ্ৰেছে সংসদীয় কাম-কাজত অহৰহ বাধাৰ সৃষ্টি কৰি মানুহক বিভ্ৰান্ত কৰিবলৈ ভুৱা অপপ্ৰচাৰ চলাই আছে আৰু শেহতীয়াকৈ ভুৱা ভিডিঅ’ প্ৰচাৰৰ জৰিয়তে তেওঁলোকৰ ভুৱা জনসমৰ্থন সংগ্ৰহৰ প্ৰচেষ্টা অতি নিন্দনীয় আৰু ইয়াৰ পূৰ্বে দেশৰ কোনো শীৰ্ষ ৰাজনৈতিক দলে এনে কৰা নাই ।”
সংবাদমেলৰ সময়ত, অমিত শ্বাহে তেওঁৰ মূল আৰু কথিত ভাষণৰ দুয়োটা সংস্কৰণ উপস্থাপন কৰে । তেওঁ কয়, "মই সকলোকে সত্য শ্বেয়াৰ কৰিবলৈ অনুৰোধ জনাইছো আৰু যিসকলে এইধৰণৰ অপপ্ৰচাৰ চলাই আছে তেওঁলোকে তেওঁলোকৰ নীতি, নিৰ্বাচনী ইস্তাহাৰৰ ওপৰতহে নিৰ্বাচনত যুঁজিব লাগে, ভুৱা ভিডিঅ' প্ৰচাৰ কৰি, সত্যক মোহাৰি আৰু বিকৃতভাৱে ৰাইজৰ আগত উপস্থাপন কৰি নহয় ।"
অমিত শ্বাহে কয় যে ভুৱা ভিডিঅ’ বনাই এনেদৰে অপপ্ৰচাৰ চলোৱাটো অতি নিন্দনীয় । উল্লেখ্য যে অমিত শ্বাহে ধৰ্মৰ ভিত্তিত থকা সংৰক্ষণ উঠাই দিয়াৰ কথা কৈছিল যদিও মিছাকৈ নিৰ্মাণ কৰা ভিডিঅ'টো এছ চি, এছ টি আৰু অ'বিচিৰ বাবে থকা সংৰক্ষণ ব্যৱস্থা উঠাই দিয়াৰ কথা কোৱা হৈছে । আনহাতে সাংবাদিকৰ প্ৰশ্নৰ উত্তৰত তেওঁ কয় যে ৰাহুল গান্ধী তথা প্ৰিয়ংকা গান্ধীৰ আত্মবিশ্বাস নাই । যাৰ বাবে তেওঁলোকৰ নিৰ্বাচন খেলা-নেখেলাৰ বিষয়টো স্থিৰ হোৱা নাই । ধৰ্মৰ ভিত্তিত আইন ঠিক নহয় বুলি সদৰী কৰি তেওঁ সমগ্ৰ দেশতে ইউ চি চি প্ৰযোজ্য কৰাৰ কথা কয় ।
ইফালে কৰ্ণাটকৰ মিত্ৰদলৰ নেতাৰ প্ৰসংগত তেওঁ কয় যে নাৰীশক্তিক কৰা অপমান কেতিয়াও সহ্য কৰা নহ’ব । বিজেপি সদায় মাতৃশক্তিৰ লগত আছে বুলি সদৰী কৰি তেওঁ কয় যে তাত কংগ্ৰেছৰ চৰকাৰ আছে যেতিয়া কিয় ব্যৱস্থা গ্ৰহণ কৰা নাই । প্ৰিয়ংকা গান্ধীয়ে কৰ্ণাটকৰ মুখ্যমন্ত্ৰীক প্ৰশ্ন কৰা উচিত বুলি তেওঁ কয় । সাংবাদিকৰ প্ৰশ্নৰ উত্তৰত তেওঁ কয় যে ভোটাৰক লৈ সংখ্যালঘূ নাইবা সংখ্যাগুৰুৰ কথা নাই । উন্নয়নৰ স্বাৰ্থত সকলোৱে বিজেপি চৰকাৰৰ প্ৰতি সমৰ্থন আগবঢ়োৱা বুলি তেওঁ কয় ।
তাৰোপৰি গুৱাহাটীৰ বশিষ্ঠস্থিত ৰাজ্যিক মুখ্য কাৰ্যালয়ত অনুষ্ঠিত সংবাদমেলখনত কেন্দ্ৰীয় গৃহমন্ত্ৰীগৰাকীৰ দাবী অসমত বিজেপি মিত্ৰজোঁটে কমেও ১২ খন আসন লাভ কৰিব । ইতিমধ্যে সমাপ্ত হোৱা দুটা পৰ্যায়ৰ নিৰ্বাচন প্ৰসংগত তেওঁ কয় যে দুটা পৰ্যায়ৰ নিৰ্বাচনত এন ডি এ ১০০খন আসনত আগুৱাই আছে । জনতাৰ সমৰ্থন আৰু আশীৰ্বাদত বিজেপিয়ে ৪০০ ৰ অধিক আসন দখলৰ লক্ষ্য নিশ্চিতভাৱে পাৰ কৰিব বুলি তেওঁ সদৰী কৰে ।
ইফালে বিজেপিৰ ৪০০ অতিক্ৰম কৰাৰ প্ৰসংগক লৈ কংগ্ৰেছ দলে বিভ্ৰান্তিৰ সৃষ্টি কৰাৰ লগতে অপপ্ৰচাৰ চলোৱা বুলি তেওঁ সদৰী কৰে । তেওঁ কয় যে বিজেপিৰ ৪০০ আসন পাৰ কৰাৰ উদ্দেশ্য সংবিধান সলনি কৰা বুলি কৈ কংগ্ৰেছে ৰাইজক বিভ্ৰান্ত কৰাৰ প্ৰয়াস কৰিছে । বিজেপিয়ে লক্ষ্যৰ ৪০০ পাৰ কৰিলে সংৰক্ষণ উঠাই দিব বুলি অপপ্ৰচাৰ চলাইছে । কংগ্ৰেছৰ এই অভিযোগ ভিত্তিহীন-নিৰৰ্থক বুলি সদৰী কৰি তেওঁ কয় যে জনতাই ২০১৪ আৰু ২০১৯ ত বিজেপিক শাসনত বহুৱাইছে । শাসনলৈ আহি বিজেপিয়ে কংগ্ৰেছৰ দৰে সংবিধানৰ ওপৰত আঘাত কৰা নাই । বিজেপি চৰকাৰে ধাৰা ৩৭০ আঁতৰ কৰাৰ লগতে তিনি তালাক, ইংৰাজৰ আইন সলনি কৰাৰ কাম কৰিছে । ৰাম মন্দিৰ প্ৰতিষ্ঠা কৰিছে । কংগ্ৰেছ দলে মিছা কথা কৈ ৰাইজক বিভ্ৰান্ত কৰিব বিচাৰিছে বুলি তেওঁ কয় । তেওঁ কয় যে বিজেপি সদায়ে এছ টি, এছ চি আৰু অ'বিচিৰ সংৰক্ষণৰ সমৰ্থক আছিল আৰু সদায়ে থাকিব ।
কংগ্ৰেছ দলেহে শাসনত থকাৰ সময়ত ধৰ্মৰ ভিত্তিত সংৰক্ষণত ব্যৱস্থা কৰি বিভিন্ন ৰাজ্যত মুছলমান সকলৰ বাবে সংৰক্ষণৰ ব্যৱস্থা কৰিছে । তেওঁ কয় যে ধৰ্মৰ ভিত্তিত কৰা সংৰক্ষণৰ ব্যৱস্থা কেতিয়াও সংবিধানিক নহয় । সেই ৰাজ্যসমূহত বিজেপিৰ চৰকাৰ হ'লে ধৰ্মৰ ভিত্তিত থকা সংৰক্ষণৰ ব্যৱস্থা আঁতৰ কৰা হ'ব বুলি সদৰী কৰি তেওঁ কয় যে ইয়াৰ দ্বাৰা এছ চি, এছ টি আৰু অ'বিচিসকলক ন্যায় দিয়া হ'ব ।
উল্লেখ্য যে মঙলবাৰৰ এই সংবাদমেলত কেন্দ্ৰীয় গৃহমন্ত্ৰীৰ লগতে মুখ্যমন্ত্ৰী হিমন্ত বিশ্ব শৰ্মা আৰু দলৰ ৰাজ্যিক সভাপতি ভৱেশ কলিতাও উপস্থিত আছিল ।
লগতে পঢ়ক : দেশত কেতিয়া কাৰ্যকৰী হ'ব ইউনিফৰ্ম চিভিল কোড ? - Lok Sabha Election 2024
