مغربی بنگال میں کورونا وائرس کے معاملات میں روز بروز اضافہ ہو رہا ہے۔جس کے نتیجے میں کورونا وائرس سے مرنے والوں کی تعداد میں بھی اضافہ ہو رہاہے۔آج دو پہر کورونا وائرس سے متاثر سی پی آئی ایم رہنما اور سابق وزیر ٹرانسپورٹ شیامل چکرورتی کی موت ہو گئی۔
گذشتہ 23 جولائی کو کورونا کی جانچ میں مثبت پائے جانے کے بعد سے وہ ایک غیر سرکاری اسپتال میں زیر علاج تھے۔آج دوپہر 1 بجکر 58 منٹ پر ان کی موت واقع ہو گئی۔وہ 76 برس کے تھے۔پسماندگان میں ایک بیٹی ہے۔چند ماہ قبل ہی ان کی اہلیہ کی موت ہوئی تھی۔
گذشتہ 19 جولائی کو ان کی طبعیت بگڑی تھی۔جس کے بعد 21 جولائی کو ان کی کورونا جانچ کی گئ تھی اور 23 جولائی کو ان کی جانچ رپورٹ مثبت آئی تھی۔29 جولائی کے بعد سے ان کی حالت کافی نازک ہوگئی تھی۔
گذشتہ روز وزیر اعلی ممتا بنرجی نے ان کی بیٹی اوشاسی چکرورتی سے فون پر ان کے والد کی طبعیت کے متعلق دریافت کی تھی۔کل رات سے ہی ان کی طبعیت مزید بگڑنی شروع ہو گئی تھی۔آج دوپہر ان کو دو بار شدید دل کا دورہ پڑا، جس کے بعد ان کی موت ہو گئی۔وہ سی پی آئی ایم کے ٹریڈ یونین کے سیکریٹری بھی رہ چکے ہیں۔
