ریاست اترپردیش کے دارالحکومت لکھنؤ میں مسلم پرسنل لا بورڈ کے رکن و لکھنؤ عیدگاہ کے امام مولانا خالد رشید فرنگی محلی نے ایک ویڈیو جاری کرکے عوام سے اپیل کی ہے کہ جلد ہی بابری مسجد مسئلے پر عدالت عظمیٰ کا فیصلہ آنے والا ہے اس لیے عوام اپنے جذبات پر قابو رکھے۔
انہوں نے کہا کہ اس فیصلے پر ملک کی ہی نہیں بلکہ بیرونی ممالک کی بھی نگاہیں ہیں، لہذا ہماری ذمہ داری بنتی ہے کہ ہم فیصلے کے بعد ملک میں امن وامان قائم برقرار رکھیں۔
انہوں نے کہا کہ آج جمعہ کا دن ہے لہذا سبھی مساجد کے ذمہ داران اور آئمہ حضرات خطبے میں یہ بتائیں کی سپریم کورٹ کا جو بھی فیصلہ آئے گا ہم اس کا احترام کریں گے، مسلمانوں کو ڈر و خوف میں رہنے کی ضرورت نہیں ہے۔
مولانا خالد رشید نے کہا کہ فیصلہ چا ہے جس کے بھی حق میں آئے کسی کو جشن منانے کی ضرورت نہیں ہے اور نہ ہی کوئی احتجاج کرنے کی ضرورت ہے۔
انہوں نے کہا کہ ہمیں ہر حال میں اپنی ذمہ داری نبھانی ہوگی تاکہ سماج میں، ملک میں بھائی چارہ، ہم آہنگی اور گنگا جمنی تہذیب قائم رہے۔
