Facility To Get Riyals for Haj Pilgrims: لکھنؤ حج ہاؤس میں بھارتی روپیہ کے بدلے ریال حاصل کرنے کی سہولت

ریاستی حج کمیٹی کے سکریٹری ایس پی تیواری نے بتایا کہ عازمین حج کو بھارتی روپے کے بدلے میں ریال حاصل کرنے کی سہولت ہے۔ حج ہاؤس میں ایس بی آئی بینک نے ایک کاؤنٹر کھولا ہے جہاں وہ عازمین حج سے درخواست لیتے ہیں اور حج ہاؤس سے متصل فوجی اسکول میں ایس بی آئی کی برانچ ہے، وہاں پر بذریعہ بس سے لے جا کر ریال فراہم کیا جاتا ہے۔

لکھنؤ: اترپردیش کے لکھنؤ میں واقع مولانا علی میاں میموریل حج ہاؤس پر عازمین حج کے آمد کا سلسلہ جاری ہے۔ ایسے میں کچھ عازمین حج کو بھارتی روپے کے بدلے ریال کی تبدیلی اور دو ہزار نوٹ کے بدلے ریال حاصل کرنے کے تعلق سے گمراہ کن خبروں کی وجہ سے پریشانیوں کا سامنا کرنا پڑ رہا ہے۔

اس مسئلے پر ریاستی حج کمیٹی کے سکریٹری ایس پی تیواری نے بتایا کہ عازمین حج کو بھارتی روپے کے بدلے میں ریال حاصل کرنے کی سہولت ہے۔ حج ہاؤس میں اس بی آئی بینک نے ایک کاؤنٹر کھولا ہے جہاں پر وہ عازمین حج سے درخواست لیتے ہیں اور حج ہاؤس سے متصل فوجی اسکول میں ایس بی آئی کی برانچ ہے، وہاں پر بذریعہ بس سے لے جا کر ریال دلوایا جاتا ہے۔

انہوں نے واضح لفظوں میں یہ بھی بتایا کہ دو ہزار کے نوٹ کے بدلے عازمین حج کو ریال دینے کی بھی سہولت موجود ہیں۔ حج ہاؤس میں دو ہزار کا نوٹ لے کر ریال دیا جاتا ہے۔ انہوں نے کہا کہ اس طرح کی جو خبریں چل رہی ہیں یا سوشل میڈیا پر وائرل ہو رہی ہیں، اس پر توجہ نہ دیں بلکہ ریاستی حج کیمٹی کے افسران سے رابطہ کرکے صحیح جانکاری حاصل کریں۔ واضح رہے کہ آر بی آئی کی جانب سے 2000 روپے کی نوٹوں کو بنک کی جانب سے جاری کرنے پر پابندی لگائی گئی ہے لیکن ستمبر 30 تک ان نوٹوں کا چلن مارکٹ میں رہے گا اور آپ 2000 روپے کے نوٹ تبدیل کروا سکتے ہیں۔