ریاست جموں و کشمیر کے ضلع ادھم پور سے تعلق رکھنے والی اننیا نے وائس آف پنجاب کا خطاب اپنے نام کر لیا ہے۔ اس امتیازی کامیابی کے لیے اننیا کو ایک لاکھ روپے کے نقد انعام سے بھی نوازا گیا ہے۔
اس شاندار کامیابی پر ان کے اہل خانہ کا کہنا ہے کہ انہیں اس بات کا علم تھا کہ ان کی بیٹی ایک اچھی فنکار ہے لیکن انہوں نے یہ کبھی نہیں سوچا تھا کہ وہ وائس آف پنجاب کا خطاب اپنے نام کر لے گی۔
قابل ذکر ہے کہ اننیا وزیراعظم نریندر مودی کے 'بیٹی بچاؤ ، بیٹی پڑھاؤ' اسکیم سے کافی متاثر ہیں۔ انہوں نے ای ٹی وی سے بات چیت کرتے ہوئے کہا کہ وہ ملک کے نوجوانوں کو یہ پیغام دینا چاہتی ہیں کہ وہ اپنے اندر کے ہنر اور فنکار کو پہچانیں اور موقع ملنے پر اس کا مظاہرہ کریں، انہوں نوجوانوں سے اپیل بھی کی ہے کہ وہ غیر سماجی کام میں ملوث نہ ہوکر ملک کے مستقبل کو بہتر بنانے کے لیے اپنی توانائی صرف کریں۔
اننیا کی والدہ کا کہنا ہے کہ ان کی بیٹی کافی ہنر مند ہے، ان کی بیٹی نے جو اعزاز حاصل کیا ہے وہ صرف اس کی محنت اور کاوش کا نتیجہ ہے۔ اور اس کا سہرا اسی کے سر ہے۔
