پارلیمانی انتخابات کے پیش نظر بی جے پی کے سینئر رہنما ڈاکٹر نرمل سنگھ نے ضلع رام بن میں بانہال کا دورہ کرکے عوامی اجتماع سے خطاب کیا۔
عوامی اجتماع سے خطاب کے دوران مودی حکومت کی تعریف کرتے ہوئے ڈاکٹر سنگھ نے کہا کہ ’’بی جے پی کے دور میں جو ترقی ملک کی عوام نے دیکھی ہے وہ انہوں نے پچھلے 70برسوں میں نہیں دیکھی تھی۔‘‘
انہوں نے خطاب کے دوران پاکستان کو بھی آڑے ہاتھوں لیتے ہوئے کہا کہ ’’پاکستان اپنی حرکتوں سے باز آجائے اور دہشت گردی بند کرے۔ پاکستان ایک غریب ملک ہے انہیں دہشت گردی (پھیلانے) کے بجائے ملک میں غریبی کے خلاف جنگ لڑنی چاہئے۔‘‘
خطاب کے بعد ذرائع ابلاغ کے نمائندوں کے ساتھ بات کرتے ہوئے سنگھ نے کہا کہ ’’دفعہ370 اور دفعہ 35 اے سے ابھی تک ریاست کو کوئی بھی فائدہ حاصل نہیں ہوا اس وجہ سے ان دفعات پربات کرنی ناگزیر ہے۔‘‘
سنگھ نے دعویٰ کیا کہ آرٹیکل پر ایک کھلی بحث کے بعد ہی بے روز گاری کو جڑ سے ختم کیا جا سکے گا۔
نیشنل کانفرس کے رہنما اور سابق وزیر اعلیٰ عمر عبداللہ کو طنز کا نشانہ بناتے ہوئے انہوں نے کہا کہ ’’حکومت سے باہر انکی زبان کچھ اور ہوتی ہے اور دور اقدار میں کچھ اور۔‘‘