پولیس کے مطابق آیف آئی آر ان افراد کے خلاف درج کی گئی ہے جنہوں نے حکومتی احکامات کی خلاف ورزی کی اور سوشل میڈیا پلیٹ فارمز کا غلط استعمال کیا۔ یہ مقدمہ غیر قانونی سرگرمیوں کی روک تھام ایکٹ ( یو اے پی اے) کے تحت درج کیا گیا ہے۔
جموں و کشمیر انتظامیہ نے ایک حکم نامہ جاری کیا ہے جس میں غلط معلومات / افواہوں کی تشہیر کے لیے شرپسند عناصر کے ذریعہ سائٹز کے غلط استعمال کو روکنے کے لیے تمام سوشل میڈیا سائٹز پر پابندی عائد کردی گئی ہے۔ حکم نامے کے مطابق افواہوں کو روکنے، غلط اور جعلی خبروں کو پھیلانے پر روک لگانے کے لیے یہ اقدام اٹھایا گیا ہے۔
حکم نامے کے مطابق علیحدگی پسند نظریے اور غیر قانونی سرگرمیوں کو فروغ دینے کے لیے شرپسندوں کی جانب سے سوشل میڈیا سائٹز کے غلط استعمال کی اطلاعات آ رہی ہیں۔
حکم نامے میں مزید کہا گیا ہے کہ جموں و کشمیر میں سوشل میڈیا پر پابندی کے باوجود بھی مختلف وی پی اینز کا استعمال کرکے شرپسند عناصر وادی کشمیر کی موجودہ سکیورٹی صورتحال کے بارے میں افواہیں پھیلا رہے ہیں۔
حکام کی جانب سے اس کے نوٹیفکیشن کے بعد سائبر پولیس اسٹیشن کشمیر زون سرینگر میں پہلی ایف آئی آر درج کی گئی ہے۔ یہ مقدمہ غیر قانونی سرگرمیوں کی روک تھام ایکٹ ( یو اے پی اے) کے تحت درج کیا گیا ہے۔
آئی جی پی کشمیر وجئے کمار نے عام لوگوں سے وی پی این کے ذریعے سوشل میڈیا کا استعمال نہ کرنے کی اپیل کی ہے۔
