ہاردک پٹیل نے اس معاملے میں گجرات ہائی کورٹ کے فیصلے کے خلاف سپریم کورٹ میں اپیل دائر کی ہے۔
گجرات کی زیریں عدالت نے ہاردک پٹیل کو سنہ 2015 کے مہسانا تشدد کے معاملے میں مجرم قرار دیتے ہوئے دو برس کی سزا سنائی تھی، جسے ہائی کورٹ نے بھی برقرار رکھا ہے۔
اس کے بعد وہ الیکشن لڑنے کے لیے نااہل قرار دیے گئے جس کے بعد انہوں نے سپریم کورٹ سے رجوع کیا ہے۔
واضح ر ہے کہ عوامی نمائندگی قانون اور عدالت کے نظام کے تحت دو برس یا اس سے زیادہ قید کی سزا پانے والا شخص الیکشن نہیں لڑ سکتا، جب تک کہ اس پر روک نہ لگائی جائے۔
گذشتہ برس جولائی میں مہسانا ضلع کے ویس نگر میں سیشن عدالت نے پٹیل کو دو برس قید کی سزا سنائی تھی۔
زیریں عدالت کے فیصلے کے خلاف ہاردک نے ہائی کورٹ میں عرضی داخل کی تھی کہ انہیں الیکشن لڑنے کے لیے سزا سے راحت دی جائے لیکن عدالت نے ان کی سزا پر روک لگانے سے انکار کر دیا۔
