بڈگام پولیس نے دعویٰ کیا ہے کہ انہوں نے ایک مخصوص اطلاع پر کارروائی کرتے ہوئے دو نوجوانوں کو عسکری صفوں میں شامل ہونے سے روک لیا۔
پولیس نے دونوں نوجوانوں کی شناخت ظاہر نہ کرتے ہوئے کہا کہ دونوں نوجوان اپنے گھروں سے چودہ مارچ کو نکلے تھے۔
بڈگام پولیس کے مطابق اس بات کی اطلاع موصول ہوتے ہی پولیس نے نوجوانوں کا سراغ لگانے کے لیے کوششیں تیز کیں۔ جموں وکشمیر پولیس کے مطابق دونوں نوجوانوں کو جنوبی کشمیر کے قصبہ ترال میں ٹریس کیا گیا۔
پولیس نے یہ بھی کہا کہ دونوں نوجوان کم عمر ٹین ایجرز (Teenagers) ہیں جنہوں نے سوشل میڈیا سے متاثر ہوکر عسکری صفوں میں شمولیت اختیار کرنے کا فیصلہ لیا تھا۔
پولیس نے اس ضمن میں پاکستان کو تنقید کا نشانہ بناتے ہوئے کہا: ’’پاکستان اس سب کے پیچھے ہے جو سوشیل میڈیا کے ذریعے نوجوانوں کو عسکری صفوں میں شامل کرنے کے لیے اکسا رہا ہے۔‘‘
بڈگام پولیس نے دونوں نوجوانوں کو اہل خانہ کے حوالے کر دیا ہے۔
