انگلینڈ کے ساوتھمپٹن میں 18جون سے کھیلے جانے والی آئی سی سی عالمی ٹیسٹ چیمپئن شپ (ڈبلیو ٹی سی) فائنل کے فاتح کو ٹیسٹ چیمپئن شپ گدا کے ساتھ انعامی رقم کے طورپر 16 لاکر ڈالر یعنی تقریباً 12 کروڑ روپے دیئے جائیں گے۔ انٹرنیشنل کرکٹ کونسل (آئی سی سی) نے پیر کو اس کا اعلان کیا۔
آئی سی سی کی طرف سے پیر کو جاری بیان کے مطابق فائنل میں شکست کھانے والی ٹیم کو آٹھ لاکھ ڈالر یعنی تقریباً چھ کروڑ روپے ملیں گے۔
ڈبلیو ٹی سی کی پوائنٹ ٹیبل میں تیسرے نمبر پر رہنے والی ٹیم کو ساڑھے چار لاکھ ڈالر یعنی تقریباً چار کروڑ روپے تو چوتھے نمبر پر رہنے والی ٹیم کو ساڑھے تین لاکھ ڈالر یعنی تقریباً ڈھائی کروڑ روپے دیئے جائیں گے۔ پانچویں اور چھٹے نمبر کی ٹیموں کو بالترتیب دو لاکھ اور ایک لاکھ کی انعامی رقم دی جائے گی۔
آئی سی سی نے واضح کیا کہ اگر ڈبلیو ٹی سی فائنل ڈرا یا ٹائی پر ختم ہوتا ہے تو مجموعی انعامی رقم دونوں ٹیموں میں برابر تقسیم کی جائے گی۔
اس کے علاوہ ٹیسٹ گدا جو پہلے آئی سی سی مرد ٹیسٹ ٹیم رینکنگ میں چوٹی پر رہنے والی ٹیم کو دیا جاتا تھا اب وہ ڈبلیو ٹی سی فاتح کو دیا جائے گا۔
خیال رہے کہ بھارت اور نیوزی لینڈ کے مابین ڈبلیو ٹی سی کا فائنل ساوتھمپٹن میں 18سے 22 جون تک کھیلا جانا ہے۔ دونوں ٹیمیں پہنچ چکی ہیں اور فائنل کے لیے تیاری کررہی ہیں۔
