اقوام متحدہ کے جنرل سکریٹری انتونیو گتیرس نے 11 دنوں سے جاری تنازع کے بعد حماس اوراسرائیل کے درمیان جنگ بندی کا خیرمقدم کرتے ہوئے کہا ہے کہ دونوں فریقوں کے رہنماوں کی ذمہ داری امن کی بحالی سے آئندہ تنازع کی اصل وجوہات کاپتہ لگانے کے لیے سنجیدہ بات چیت شروع کرنے کی ہے۔
انتونیو گٹیرس نے تشدد کے تمام متاثرہ اور ان کے عزیزوں کے تئیں اپنی گہری تعزیت کا اظہارکرتے ہوئے کہا کہ ’’میں 11 دنوں کی خطرناک دشمنی کے بعد غزہ اور اسرائیل کے درمیان جنگ بندی کا خیر مقدم کرتا ہوں۔ قابل ذکر ہے کہ 11 دنوں کے مہلک تنازعہ کے بعد جمعرات کو اسرائیل اورحماس کے مابین سیزفائر کامعاہدہ ہوا۔ پرتشدد واقعات میں 60 بچوں سمیت 232 فلسطینی مارے گئے۔
اقوام متحدہ کی سرکاری ویب سائٹ نے اپنے چیف کے حوالے سے کہا کہ ’’میں اقوام متحدہ کے ساتھ قریبی ہم آہنگی میں کی گئی کوششوں کے لئے مصر اور قطر کی ستائش کرتا ہوں، تاکہ غزہ اور اسرائیل میں امن بحال کرنے میں مدد مل سکے۔‘‘ انہوں نے کہا کہ میں نے تمام فریقوں کو سیز فائر کی پیروی کرنے کوکہا ہے۔
(یو این آئی)
