'ایودھیا معاملے کافیصلہ سنانا چیلنجنگ رہا'

رام جنم بھومی معاملہ میں فیصلہ سنانے والے سپریم کورٹ کے پانچ ججوں کی بنچ کی صدارت کرنے والے اس وقت کے چیف جسٹس رنجن گوگوئی نے کہا کہ، 'اس کیس میں فیصلہ سنانا ایک چیلنجنگ کام تھا۔'

جسٹس گوگوئی نے صحافی مالا دکشت کی کتاب 'ایودھیا سے عدالت تک بھگوان شری رام (سپریم کورٹ میں چالیس دن سنوائی کی ان چھوئے پہلوووں کی آنکھوں دیکھی داستان) پر ورچوئل بات چیت میں بھیجے گئے اپنے پیغام میں یہ کہا۔

جسٹس گوگوئی نے اپنے پیغام میں کہا ، 'ایودھیا معاملہ ملک کی قانونی تاریخ میں میں لڑے جانے والے کیسز میں ہمیشہ ایک خاص مقام رکھے گا۔'

اس معاملے سے جڑے مختلف زبانی اور دستاویزی ثبوتوں کے ساتھ اس معاملے کو حتمی فیصلے کے لیے لایا گیا تھا۔ یہ ریکارڈ مختلف زبانوں سے ترجمہ کرائے گئے تھے۔

جسٹس گوگوئی نے کہا کہ حتمی فیصلے تک پہنچنا کئی وجوہات سے ایک چیلنجنگ کام تھا۔ چالیس دن تک مسلسل سماعت میں مشہور وکیلوں کی بنچ کو دیا گیا تعاون غیرمعمولی تھا۔

کتاب میں تمام واقعات کو ایک نقطہ نظر کے ساتھ بیان کیا گیا ہے، جس میں مجھے یقین ہے کہ پڑھنے والوں کو دلچسپ لگے گا۔