جھارکھنڈ کے سرائے کیلا میں ہونے والی ماب لنچنگ کا ذکر اب اقوامتحدہ میں بھی کیا گیا، اس کے بعد ملک میں اس ضمن میں لوگوں کے ردعمل آنا شروع ہوگئے۔
اسی ضمن میں آل انڈیا مجلس اتحادالمسلمین (اے آئی ایم آئی ایم) حیدرآباد پارلیمانی حلقے سے رکن پارلیمان اسدالدین اویسی نے جھار کھنڈ میں تبریز نامی نوجوان کے ماب لنچنگ پر ردعمل کا اظہار کرتے ہوئے کہا کہ یہ سانحہ آر ایس ایس اور بی جے پی کے ذریعے مسلمانوں کے خلاف پھیلائے نفرت کا نتیجہ ہے، اب اس طرح واقعات پر قابو پانا مشکل ہو گیا ہے۔
اسدالدین اویسی نے کہا کہ بی جے پی، آر ایس ایس اور اس کی ذیلی تنظیموں نے مسلمانوں کے خلاف نفرت پھیلایا ہے۔
اویسی کا کہنا تھا کہ بی جے پی اور آر ایس ایس نے ایسے ماحول بنائے ہیں، جہاں مسلمانوں کو دہشت گرد، قوم مخالف اور گائے کو کاٹنے والا سمجھا جا رہا ہے۔
خیال رہے کہ جھارکھنڈ میں ہجومی تشدد کے ایک نئے واقعے میں بھیڑ نے چوری کے شک میں 24 برس کے ایک مسلم نوجوان تبریز پر اتنا تشدد کیا کہ اس کی موت ہو گئی۔
اسدالدین اویسی نے کہا کہ اگر وزیراعظم نریندر مودی آزادی کی 75ویں سالگرہ منانے جارہے ہیں تو کیا ہم اس طرح کے واقعات سے آزادی کی سالگرہ منائیں گے؟
