کشمیر اکنامک الائنس نے جموں و کشمیر میں جماعت اسلامی پر پابندی کے خلاف افسوس کا اظہار کیا ہے اور مرکزی حکومت پر الزام عائد کیا کہ جماعت پر پابندی عائد کر کے وادی کے حالات مزید کشیدہ بنانے کی کوشش کی جا رہی ہے۔
اکنامکس الائنس کے چئیرمین محمد یاسین نے ایک پریس کانفرنس کے دوران کہا کہ جموں و کشمیر کے 35 اے کے ساتھ چھیڑ چھاڑ کر کے کشمیری کے عوام کے جذبات سے کھیلا جارہا ہے ۔
انہوں نے کہا :'جماعت اسلامی ایک دینی تنظیم کے ساتھ ساتھ ایک سیاسی اور فلاحی جماعت ہے اور وادی بھر میں درجنوں عوامی فلاح و بہبود کے ادارے قیام ہیں۔
چئیرمین نے کہا یہ فلاحی اداروں نے ہر وقت عوام کو مدد فراہم کرتے ہوئے قابل فکر کام انجام دیے ہیں'۔
محمد یاسین نے کہا کہ جماعت اسلامی کے زیر انتظام ان گنت اسکول اور دینی مراکز بچوں کو تعلیم کے نور سے منور کرتے ہیں اور اب اسی صلاح و فلاح جماعت پر پابندی عائد کرنا قابل مذمت ہے۔
انہوں نے کہا کہ ریاست کی خصوصی پوزیشن 370اور 35 اے سے چھیڑ چھاڑ کی افواہوں نے وادی کشمیر کے عوام میں مزید تذبذب اور بے چینی پیدا کی ہے جس سے آنے والے وقت میں وادی کے شعبہ تجارت اور سیاحتی شعبہ کے علاوہ دوسرے شعبہ جات میں بھی منفی اثرات منڈلا رہے ہیں ۔
