وسطی کشمیر کے ضلع گاندربل میں سینٹرل یونیورسٹی قائم کرنے کے لئے 5000 کنال سے زائد اراضی 2009 میں فراہم کی گئی۔ تاہم ایک دہائی سے زیادہ عرصہ گزر جانے کے بعد بھی عمارتی کام تکمیل سے کوسوں دور ہے۔
اس ضمن میں مقامی لوگوں نے افسوس کا اظہار کرتے ہوئے کہا کہ ’’کئی بار گزارشات کرنے کے باوجود سینٹرل یونیورسٹی کے کام میں سرعت نہیں لائی گئی۔‘‘
لوگوں نے الزام عائد کرتے ہوئے کہا کہ ’’سینٹرل یونیورسٹی دیگر مقامات پر عارضی ڈھانچے تعمیر کر رہی ہے جس سے ایسا لگتا ہے کہ سینٹرل یونیورسٹی تلہ مولہ کے مین کیمپس میں یونیورسٹی قائم کرنے میں سنجیدہ نہیں۔‘‘
ایک مقامی سماجی کارکن نے تشویش کا اظہار کرتے ہوئے کہا کہ ’’دس سال سے زائد عرصہ گزرنے کے باوجود یونیورسٹی نے محض دو یا تین عارضی شیڈ (ڈھانچے) تعمیر کیے ہیں جس سے طلبا سمیت گارندربل کی وسیع آبادی کو تشویش لاحق ہو گئی ہے۔‘‘
اس ضمن میں عوام الناس نے سینٹرل یونیورسٹی کے تعمیری کام میں سرعت لانے کے لیے ایل جی انتظامیہ سے مداخلت کی اپیل کی ہے۔
