'నేతన్నలను ప్రభుత్వం ఆదుకోవాలి'

రాష్ట్రంలోని చేనేత కార్మికులను ఆదుకోవడంలో ప్రభుత్వం ఘోరంగా విఫలమైందని నేతన్నల ఐక్యకార్యాచరణ కమిటీ ఆరోపించింది. నేతన్నల సంక్షేమం పట్ల ప్రభుత్వం మొండి వైఖరి మాని వారిని ఆదుకోవడానికి హేతుబద్ధమైన ప్రయత్నాలను ముమ్మరం చేయాలని డిమాండ్​ చేసింది.

కరోనా కారణంగా కుదేలైన నేతన్నలు హైద్రాబాద్​లోని రాష్ట్ర కార్యాలయంలో ముఖ్య నాయకులు వీడియో కాన్ఫరెన్స్ సమావేశం నిర్వహించారు. సమకాలీన పరిస్థితులలో నేతన్నలు ఎదుర్కొంటున్న పలు సమస్యలపై ప్రస్తావించారు. నేతన్నలకు 93కోట్ల రూపాయలను అందుబాటులోకి తీసుకొచ్చామన్న కేటీర్ వ్యాఖ్యలు హాస్యాస్పదంగా ఉన్నాయని కమిటీ అభివర్ణించింది. ఓ వైపు కష్టాలతో సతమతమవుతున్న నేతన్నలను ఆదుకోవడం మాని... థ్రిఫ్టు ఫండ్​ను వాడుకోమని చెప్పటం విడ్డూరంగా ఉందన్నారు.

చేనేత వృత్తికి చీడపురుగులా దాపురించిన కార్పొరేట్ షాపింగ్ మాల్​ల మోసపూరిత బాగోతాలు మంత్రి కేటీఆర్​ దృష్టికి రాకపోవడానికి గల కారణాలేమిటో తెలపాలని కోరారు. ఇప్పటివరకు ఆత్మహత్య చేసుకున్న నేతన్నల కుటుంబాన్ని మంత్రి పరామర్శించిన పాపాన పోలేదన్నారు. ఎన్నికల సందర్భంగా ఇస్తానన్న 5 లక్షల ఉచిత ఇన్సూరెన్స్ ఏమైందని నిలదీశారు. ప్రభుత్వం ఇకనైనా నేతన్నలను మభ్యపెట్టడం మానుకోవాలని.. గతంలో చేసిన హామీలను అమలు చేయాలని నేతలు డిమాండ్ చేశారు.