రంగుల పండుగ... జీవితాల్లో వసంతం నింపగా!

రంగులు చల్లుకున్నారు. టామాటాలతో కొట్టుకుంటూ సందడి చేశారు. బురదలో చిందులేశారు. వర్షపు నృత్యాలంటూ కేరింతలు కొట్టారు. చిన్నా పెద్దా అంతా... రంగుల పండుగను ఆద్యంతం ఆస్వాదించారు. రాజధాని నగరాన్ని సప్తవర్ణశోభితం చేశారు.

హోలీ వేడుకలతో నగరం వర్ణశోభితంగా మారింది. చిన్నా పెద్దా తేడా లేకుండా అందరూ రంగుల్లో మునిగితేలారు. ప్రధాన రోడ్లు, వీధులు, పార్కులు, మైదానాలతోపాటు ప్రత్యేక ఏర్పాట్లతో హోలీ సంబురాలు హోరెత్తాయి. బేగంపేటలోని దేవనార్‌ అంధుల పాఠశాల విద్యార్థులతో పలు స్వచ్ఛంద సంస్థల సభ్యులు పండుగను జరుపుకున్నారు. ఫీపుల్స్‌ప్లాజాలో ఏర్పాటు చేసిన హోలీ వేడుకల్లో యువత అధిక సంఖ్యలో పాల్గొన్నారు. డీజే పాటలతో వర్షపు నృత్యం, టామోటాలతో సరదాగా కొట్టుకుంటూ హోలీ ఆడారు.

నటీనటులతోహోలీ సంబురాలు...
ఐమాక్స్‌ సమీపంలోని హెచ్‌ఎండీఏ మైదానంలో ఏర్పాటు చేసిన వేడుకల్లో సినీ, బుల్లి తెర నటీనటులు పాల్గొని యువతతో కలిసి ఉత్సహంగా హోలీ ఆడారు. బేగంపేటలోని కంట్రీ క్లబ్‌లో ఏర్పాటు చేసిన వేడుకల్లో ఫలక్​నూమాదాస్​ చిత్ర యూనిట్‌ సభ్యులు పాల్గొన్నారు. కథానాయిక అర్చన రంగులతో తడిసిముద్దయ్యారు. అందరూ సహజసిద్ధమైన రంగులతోనే హోలీ సంబురాలు జరుపుకోవాలని కోరారు.

టమాటాలు, బురదతో సందడి...
వర్షపు నృత్యం, టమాటా, బురద హోలీలతో పర్యావరణ హితమైన వేడుకలను జరుపుకోవటం ఆనందంగా ఉందని యువత హర్షం వ్యక్తం చేశారు.

రంగులమయం కావాలి...
గల్లీలన్నీ సప్తవర్ణశోభితంగా మార్చే హోలీ ప్రతి ఒక్కరి జీవితాన్ని రంగులమయం చేయాలని నగరవాసులు ఆకాంక్షించారు.

ఇవీ చూడండి:రాజకీయ నేతలైనా 'రంగు పడాల్సిందే'