ఐపీఎల్​ ఆల్​స్టార్స్​: ధోనీ, కోహ్లీ, రోహిత్​ ఒకే జట్టులో!

ఐపీఎల్​ నిర్వాహకులు మరో సరికొత్త మ్యాచ్​కు రంగం సిద్ధం చేస్తున్నారు. ఇందులో టీమిండియా స్టార్​ ప్లేయర్లు ధోనీ, కోహ్లీ, రోహిత్​ ఒకే జట్టులో కనువిందు చేయనున్నారు. ఈ ఆల్​ స్టార్​ మ్యాచ్​ తొలి సీజన్​ ఈ ఏడాది నుంచే ప్రారంభమవుతుందని తెలుస్తోంది.

భారత క్రికెట్​లో నూతన అధ్యాయం ఐపీఎల్​. వినూత్న ఆలోచన, పొట్టి ఫార్మాట్​లో తీసుకొచ్చిన ఈ టోర్నీ సూపర్​ హిట్టుగా నిలిచింది. అలాంటి ఈ లీగ్​ను మరింత ఆసక్తికరంగా మార్చేందుకు రంగం సిద్ధం చేస్తున్నారు నిర్వాహకులు. టోర్నీ ఆరంభంలో ఒక మ్యాచ్​ను ఏర్పాటు చేయనున్నారు. దీనికి 'ఆల్​ స్టార్​' మ్యాచ్​గా పేరు పెడుతున్నారు. ఇది టోర్నీకి మూడు రోజుల ముందు జరగనుంది.

నాలుగేసి జట్లుగా...

ప్రస్తుతం ఐపీఎల్​లో ఎనిమిది జట్లు ఉన్నాయి. వాటిలో ఉత్తర, తూర్పు రాష్ట్రాలు ఒకవైపు, దక్షిణ, పడమర రాష్ట్రాల జట్లు మరో వైపు కలిసి ఆడనున్నాయి. ఫలితంగా కింగ్స్​ ఎలెవన్​ పంజాబ్​, దిల్లీ క్యాపిటల్స్​, రాజస్థాన్​ రాయల్స్​, కోల్​కతా నైట్​రైడర్స్​ ఒక బృందంగా ఏర్పడనున్నాయి. చెన్నై సూపర్​కింగ్స్​, రాయల్​ ఛాలెంజర్స్​ బెంగళూరు, సన్​రైజర్స్​ హైదరాబాద్​, ముంబయి ఇండియన్స్​ ప్రత్యర్థి జట్టుగా ఉండనున్నాయి. ఇదే జరిగితే కోహ్లీ, ధోనీ, రోహిత్​ ఒకే జట్టులో టీమిండియా జెర్సీ లేకుండా ఆడనున్నారు. ఇంకా తేదీలు, వేదిక ఖరారు కావాల్సి ఉంది.

ఐపీఎల్​ మ్యాచ్​ల ప్రారంభాన్ని 8 గంటలకు కాకుండా అరగంట ముందుగా 7.30 గంటలకే ప్రారంభించాలని కోరినా తగ్గేది లేదని నిర్వాహకులు వెల్లడించారు. ఐపీఎల్​ ఫైనల్​ ముంబయిలోని వాంఖడేలో జరగనుంది.