పట్టభద్రులకు బ్రిటన్ ఎర్ర తివాచీ​

పీహెచ్​డీ పట్టభద్రులకు ఎటువంటి ఆంక్షలు లేకుండా వీసాలు మంజూరు చేయాలని బ్రిటన్​ ప్రభుత్వం నిర్ణయం తీసుకుంది. ఈ నిర్ణయంతో అధిక సంఖ్యలో భారతీయులు లాభపడనున్నారు.

పీహెచ్​డీ పట్టభద్రులకు ఎర్ర తివాచీ పరిచేందుకు నిర్ణయం తీసుకుంది బ్రిటన్. ఈ నిర్ణయంతో లాభపడే వారిలో భారతీయులు అధిక సంఖ్యలో ఉన్నారు.
ఉన్నత చదువులు చదివిన వారికి ఎలాంటి వీసా ఆంక్షలు ఉండబోవని ఈ నిర్ణయం ఏడాది చివర్లో అమల్లోకి వస్తుందని బ్రిటన్ ఛాన్స్​లర్ ఫిలిప్​ హమండ్​​ ప్రకటించారు.

"సాంకేతిక విప్లవంలో బ్రిటన్​ను ముందంజలో నిలిపి ఆర్థిక మూలాల్ని పటిష్టం చేసుకునే దిశగా ముందుకెళ్తున్నాం. దీనిలో భాగంగా ఉన్నత విద్యావంతులకు వీసా ఆంక్షల్ని సడలించాం. ఈ ఏడాది చివరి నుంచి పీహెచ్​డీ పట్టభద్రులకు ఏ విధమైన వీసా ఆంక్షలు ఉండవు." -ఫిలిప్​ హమండ్​, బ్రిటన్​ ఛాన్స్​లర్​

ఈ నూతన విధానం అమల్లోకి వస్తే సాధారణ వీసాలకు వర్తించే టైర్-2 నిబంధనలు పీహెచ్​డీ పట్టభద్రులకు వర్తించవు. పరిశోధకులు ఇతర దేశాల్లో తమ అధ్యయనాన్ని కొనసాగించేందుకు వీలుగా 180 రోజులు బ్రిటన్​లో ఉండాలనే నిబంధనను సైతం సడలించనుంది ప్రభుత్వం.

భారతీయులు అధికం...

2018వ సంవత్సరంలో టైర్​-2 వీసా కేటగిరి కింద బ్రిటన్​ వెళ్లిన వారిలో గత ఏడాదితో పోలిస్తే 6 శాతం భారతీయులు పెరిగారు. బ్రిటన్​ విద్యా వ్యవస్థలో అధ్యాపకుల సంఖ్యలో భారత్​కు చెందినవారు మూడో స్థానంలో ఉన్నారు.

బ్రిటన్ ప్రభుత్వ నిర్ణయాన్ని అక్కడి విశ్వవిద్యాలయాలు స్వాగతిస్తున్నాయి. పరిశోధకులకు నిబంధనలు సడలించడం కారణంగా అంతర్జాతీయ స్థాయి పరిశోధనలు జరిగే అవకాశం ఉందని హర్షం వ్యక్తం చేస్తున్నాయి.