ఆరోగ్యం.. ఆహ్లాదం కోసం 'బ్యాంబు' యోగా

ఆసియా దేశం హాంగ్​కాంగ్​లో ప్రస్తుతం వెదురు బొంగు యోగా బాగా ప్రాచుర్యంలోకి వచ్చింది. అక్కడ వేసవి తాపం నుంచి తప్పించుకోవడానికి... ప్రజలు సముద్రతీరంలో వెదురు యోగా చేస్తూ సేదతీరుతున్నారు.

యోగా.. ప్రస్తుతం ప్రపంచమంతా ఈ పేరును జపిస్తోంది. ఆరోగ్యకరమైన జీవితం గడపడానికి యోగా ఎంతగా సహకరిస్తుందో ఇప్పుడిప్పుడే ప్రపంచ ప్రజలు తెలుసుకుంటున్నారు. వారికి అనువైన రీతిలో యోగాభ్యాసం చేస్తున్నారు. తాజాగా వెదురు బొంగు యోగా ప్రాచుర్యంలోకి వచ్చింది. మరి అదేంటో తెలుసుకుందామా?

బొంగులో యోగా..

హాంగ్​కాంగ్​లో ఎండలు మండిపోతున్నాయి. వేసవి తాపం నుంచి తప్పించుకోవడానికి నగరవాసులు సముద్రతీరాలకు చేరుకుంటున్నారు. వెదురు బొంగు యోగా చేస్తూ సేదతీరుతున్నారు.

అలెగ్జాండ్రా మిలేవిక్జ్​ ఈ వెదురు యోగాను హాంగ్​కాంగ్ ప్రజలకు పరిచయం చేశారు. సముద్రతీరంలో 3 వెదురు బొంగులతో ఏర్పాటుచేసిన ట్రైపాడ్​కు వేలాడుతూ.. ఈ యోగా చేస్తారు. ప్రకృతిని ఆస్వాదిస్తూనే, ఆరోగ్యాన్ని మెరుగుదిద్దుకోవడానికి ఇది ఎంతో సహకరిస్తుందని ఆమె చెబుతున్నారు.

"నేను 2017 మే నెలలో వెదురు యోగా ప్రారంభించాను. థాయిలాండ్​లో ఉపాధ్యాయ శిక్షణ తీసుకుంటున్న సమయంలో నాకు ఈ ఆలోచన పుట్టింది. నేను వైమానిక శిక్షణ కూడా పొందాను. హాంగ్​కాంగ్​లో ఎంతో అందమైన ప్రకృతి, మంచి బీచ్​లు ఉన్నాయని నాకు తెలుసు. అందువల్ల వెదురు యోగా అనే భావనను ఇక్కడకు తీసుకురావాలని ఆలోచించాను. ప్రస్తుతం ఇది బాగా పనిచేస్తోంది.

ఈ యోగా కార్యక్రమంలో పాల్గొనేవారు నగరం నుంచి బయటపడాలని, మన చుట్టూ ఉన్న అందమైన ప్రకృతిని ఆస్వాదించాలని నేను కోరుకుంటున్నాను. సురక్షితంగా, ఆరోగ్యంగా జీవించాలనే భావన వారంతట వారికి కలగాలని ప్రయత్నిస్తున్నాను." - అలెగ్జాండ్రా మిలేవిక్జ్​, వెదురు యోగా వ్యవస్థాపకురాలు

ఇదీ చూడండి: వణికిపోయిన జర్మనీ ఛాన్స్​లర్ మెర్కెల్