చైనాకు చెందిన టెలికం సంస్థ హూవావే-అమెరికా ప్రభుత్వం మధ్య వివాదం ఇంకా చల్లారలేదు. ప్రభుత్వ సంస్థలు హువావే ఉత్పత్తులు కొనకూడదని ఇటీవల ట్రంప్ సర్కారు జారీ చేసిన ఆదేశాలపై తీవ్ర అభ్యంతరం తెలిపింది ఆ సంస్థ. అమెరికా నిర్ణయాన్ని సవాలు చేస్తూ టెక్సాస్ కోర్టులో వాజ్యం దాఖలు చేసింది.
ఏం జరిగింది?:
హువావే సంస్థ చైనాకు గూఢచారిలా పనిచేస్తోందని, అందుకే ప్రభుత్వ కార్యకలాపాల్లో ఆ ఉత్పత్తులను నిషేధిస్తున్నట్లు ఇటీవల ట్రంప్ సర్కారు ప్రకటించింది. 2019 అమెరికా రక్షణ బిల్లు ఆధారంగా ఈ నిర్ణయం తీసుకుంది.
ఆధారాలున్నాయా?:
హువావే మాత్రం అమెరికా నిరాధార ఆరోపణలు చేస్తోందని మండిపడింది.
అమెరికా ఆరోపణలు చేస్తోంది తప్ప సాక్ష్యాలు చూపించటం లేదు. దీనిపై మేము న్యాయ పోరాటానికి సిద్ధం. అమెరికా ప్రభుత్వం నిందలతో సంస్థపై బురద జల్లుతోంది. అమెరికానే మా మెయిల్స్, సర్వీస్ కోడ్స్ హ్యాక్ చేసింది - గు పింగ్, హువావే సంస్థ ఛైర్మన్
సరికొత్త టెక్నాలజీ తెస్తున్న సమయంలో :
ఈ కేసుల విషయం పక్కన పెడితే అమెరికాలో కొత్త టెక్నాలజీ ప్రవేశపెట్టేందుకు ప్రణాళికలు రచిస్తోంది చైనా టెలికం సంస్థ. 5జీ సేవలు అందించే సంస్థల్లో మొదటి స్థానంలో నిలవాలని భావిస్తోంది. ప్రస్తుత అమెరికా ప్రభుత్వ చర్యలను సంస్థ అభివృద్ధికి ఆటంకాలుగా పరిగణిస్తున్నారు హువావే ప్రతినిధులు.
హువావేలోకి మీడియా:
అమెరికా ప్రభుత్వ ఆరోపణలు తిప్పికొట్టేందుకు వివిధ చర్యలు చేపట్టింది హువావే. అందులో భాగంగానే అంతర్జాతీయ మీడియా సంస్థలను చైనాలోని దక్షిణ గాంగ్డాంగ్ ప్రధాన కార్యలయం, రీసెర్చ్ సెంటర్లోకి ఆహ్వానించింది. వారికి తయారీ విధానాన్ని వివరించింది.
ఇది వరకే ఒక వివాదం:
ఇరాన్పై అమెరికా ఆంక్షలు లెక్కచేయకుండా ఆ దేశంలో కార్యకలాపాలు నిర్వహిస్తున్నందుకు హువావేపై కెనడాలో ఇప్పటికే కేసులు నమోదయ్యాయి. ప్రస్తుతం ఈ కేసు విచారణలో ఉంది.
