పట్టుదల ఉంటే ఏదైనా సాధించొచ్చని నిరూపిస్తోంది ఒడిశా జాజ్పుర్ జిల్లా జహాల్ గ్రామానికి చెందిన ఓ మహిళ. గ్రామీణ ప్రాంతానికి చెందిన మహిళ ద్విచక్రవాహనం నడిపితేనే ఆశ్చర్యపోతాం. అటువంటిది ఈ వివాహిత.. వివిధ వాహనాలతో పాటు గుర్రపు స్వారీ కూడా సునాయాశంగా చేస్తోంది. గుర్రం, బైక్, కారు, ట్రాక్టర్, ట్రక్కు ఇలా ఏ వాహనమైనా ఇట్టే నడిపేస్తోంది మోనాలీసా. సంప్రదాయ చీరకట్టులో ఆమె చేస్తున్న ఈ విన్యాసాలకు రూ.లక్షల్లో సంపాదనే కాక అందరి ప్రశంసలు దక్కుతున్నాయి.
ఐదేళ్ల క్రితం మొదలు..
2016లో మోనాలీసా భర్త బద్రీ నారాయణ్ భద్ర తొలిసారిగా యూట్యూబ్లో ఆమెకు సంబంధించిన ఓ వీడియోను అప్లోడ్ చేశాడు. ఆ వీడియోకు ఆదరణ రావడం చూసి.. ఆ తర్వాత గుర్రపుస్వారీ, బుల్లెట్ బైక్, భారీ వాహనాలను నడుపుతున్న వీడియోలను అప్లోడ్ చేశాడు. ఈ క్రమంలోనే వారి యూట్యూబ్ ఛానెల్ 2.28 మిలియన్ సబ్స్క్రైబర్లను అందుకుంది. మోనాలీసాకు ఆమె భర్త సహా కుటుంబం మద్దతు తెలిపింది.
వాహనాల సవారీలకు సంబంధించిన వీడియోలతో పాటు ఆమె పెంపుడు జంతువులు, కోతులు సహా ఇతర ప్రాణులకు ఆహారం అందిస్తున్న వీడియోలను కూడా మోనాలీసా షేర్ చేస్తుంది. వీటికి కూడా ఆదరణ దక్కుతోంది.
గ్రామీణ ప్రాంతాల్లోని వివాహితలు ఇంటికే పరిమితం కావాలన్న హద్దును చెరిపేసి మోనాలీసా చేస్తున్న ప్రయత్నం అందరికీ ఆదర్శనీయంగా ఉంది.
ఇదీ చదవండి : ఫుడ్ డెలివరీ గర్ల్గా ఇంటర్ అమ్మాయి
