"మీకు నచ్చిన ఛానళ్లను ఎంపిక చేసుకుని చూడండి.. అవసరమైనంత మాత్రమే చెల్లించండి" అంటూ ట్రాయ్ కొద్ది రోజులుగా చెబుతోంది. కొందరు దీనిని సమర్థిస్తుంటే మరికొందరు ప్రయోజనం లేదని పెదవి విరుస్తున్నారు. కేబుల్ ఆపరేటర్లు అవసరం లేని ఛానళ్లకు సబ్స్క్రైబ్ చేయించి ప్రజల జేబులు ఖాళీ చేస్తున్నారన్నది వారి ప్రధాన ఆరోపణ. ఈ దోపిడీని అరికట్టడానికి మీరు ఎంపిక చేసుకున్న ఛానళ్లకు మాత్రమే చెల్లించండని ట్రాయ్ అంటోంది.
కొత్త నిబంధన ప్రకారం తక్కువ ఖర్చులోనే కావాల్సిన ఛానళ్లను ఎంపిక చేసుకునేందుకు ఓ కొత్త యాప్ తీసుకువచ్చింది.
ఛానల్ సెలక్టర్ యాప్..
ట్రాయ్ ఆప్ కొత్తగా ప్రవేశపెట్టిన ఛానల్ ప్యాక్స్ని ఎంచుకోవడానికి ట్రాయ్ 'ఛానల్ సెలక్టర్ యాప్' తీసుకువచ్చింది. సంస్థ అధికారిక వెబ్సైట్ నుంచి దీనిని పొందవచ్చు. ఛానల్ సెలక్టర్ యాప్లో 'గెట్ స్టార్టెడ్' పై క్లిక్ చేయాలి. అనంతరం మీ వివరాలు నమోదు చేయాలి. అన్ని వివరాలు ఆప్షనల్ మాత్రమే. మీకు నచ్చితేనే ఇవ్వండి. ప్రాంతాన్ని మాత్రం తప్పకుండా నమోదు చేయండి. ఎందుకంటే మీ ప్రాంతాన్ని బట్టి రీజనల్ ఛానళ్లను తెలుసుకోవచ్చు.
ఆ తర్వాత వివిధ విభాగాల్లో ఏది కావాలో... అంటే వార్తలు, సంగీతం, భక్తి, క్రీడలను ఎంపిక చేసుకోవాలి. హెచ్డీ, ఎస్డీ ఏదో ఒకటి సెలెక్ట్ చేసుకోవాలి. అంతే అవసరైన ఛానల్ లిస్ట్ తయారవుతుంది.
ఏ ఛానళ్లు ఎన్ని..
అనంతరం 'ఫ్రీ టు ఎయిర్ ఛానల్' ట్యాబ్పై క్లిక్ చేయాలి. పైన ఉన్న 'ఛానల్ సెలక్టెడ్' ఏరియాలో మీ ఛానళ్ల వివరాలను తెలుసుకోవచ్చు. అక్కడే మీ ఛానళ్లకు ఎంత చెల్లించాలో తెలుస్తుంది. ఫ్రీ ఛానళ్ల సంఖ్య 550. వాటిలో మీకు కావల్సినవి ఎంచుకున్న తర్వాత పే ఛానళ్లను సెలక్ట్ చేసుకోవాలి. ఈ సెక్షన్లో ఛానళ్ల వివరాలను ప్రాంతం, నాణ్యత, అంశం, ధర ఆధారంగా వరుసలో చూడొచ్చు.
ప్యాక్స్
చివరగా 'ఛానల్ బొకే' లిస్టుకు వెళ్లి అక్కడ మీకు తగిన ప్యాక్ను ఎంచుకోండి. మీ ఛానళ్లన్నీ 'మై సెలక్షన్'లో ఉంటాయి. మొత్తం ఎన్ని ఉన్నాయి.... అందులో ఎఫ్టీపీ, పే ఛానళ్లు ఎన్నో తెలుసుకోవచ్చు. కనీసం 25 ఛానళ్లను ఎంపిక చేసుకోవాలి. అనంతరం 'ఆప్టిమైజ్' బటన్పై క్లిక్ చేస్తే రిపీట్ అయిన ఛానళ్లను తీసేసి.. మీకు సరసమైన ధరలలో లభించే ఛానళ్లను అందిస్తుంది.
ఉదాహరణకు మీరు ఏదో ఒక ఛానల్ను ఎంపిక చేసుకున్నారు..అదే ఛానల్ మీరు ఎంపిక చేసుకున్న ప్యాక్లో కూడా ఉంటే అందులో ఏది తక్కువ ధరకు వస్తుందో అదే ఉంటుంది. నెలవారీ బిల్లు ఎక్కువ కాకుండా ఇది సాయపడుతుంది.
ఛానళ్లను ఎంపిక చేసుకుని ఆప్టిమైజ్ చేసిన తర్వాత ఆ వివరాలను మీ ల్యాప్టాప్ లేదా కంప్యూటర్లో నిక్షిప్తం చేసుకోవాలి. డీటీహెచ్, కేబుల్ ఆపరేటర్ వెబ్సైట్లోకి వెళ్లి ఈ ఛానళ్లను కాపీ చేయాలి. అంతే మీరు కోరుకున్న ఛానళ్లు మీ టీవీలో ప్రసారం అవుతాయి.
