పుల్వామా దాడిలో ప్రాణాలర్పించిన జవాన్ల కుటుంబసభ్యుల సహాయార్థం క్రికెట్ దిగ్గజం సచిన్ తెందుల్కర్ ముందుకొచ్చాడు. ఐడీబీఐ జీవిత బీమా సంస్థ ఆధ్వర్యంలో ఆదివారం నాడు దిల్లీలో నిర్వహించే మారథాన్లో పాల్గొననున్నాడు. ఈ కార్యక్రమం ద్వారా వచ్చే సొమ్మును అమరవీరుల కుటుంబాలకు ఇవ్వనున్నారు.
మారథాన్ కంటే ముందు దిల్లీలోని జవహారలాల్ నెహ్రూ స్టేడియంలో పుషప్స్ తీసి '#కీప్ మూవింగ్ పుషప్ ఛాలెంజ్'లో పాల్గొంటాడు సచిన్. ఈ మారథాన్లో ఒక్కొక్కరి నుంచి రూ.100 వసూలు చేసి ఆ నిధిని అమర వీరుల కుటుంబాలకు ఇవ్వనుంది ఐడీబీఐ ఫెడరల్ సంస్థ.
18వేల మంది పాల్గొనే మారథాన్ నాలుగు విభాగాలుగా నిర్వహిస్తారు. ఫుల్ మారథాన్(42 కి.మీ)లో 2000, హాఫ్ మారథాన్(21కి.మీ)లో 6000, 10కే రన్లో 5500, 5కే స్వచ్ఛభారత్ మారథాన్లో 4500 మంది పాల్గొంటారు. ఐడీబీఐ ఫెడరల్ లైఫ్ ఇన్సూరెన్స్ సంస్థకు తెందుల్కర్ బ్రాండ్ అంబాసిడర్గా వ్యవహరిస్తున్నాడు.
"మన హద్దుల్ని చెరిపేసి, సమస్యను సవాల్గా స్వీకరిస్తే విజయం వరిస్తుంది. దీన్ని నేను గట్టిగా విశ్వసిస్తాను. రన్నర్లందరూ నాతో కలిసి ఈ సవాల్ని స్వీకరించి భవిష్యత్తుని ధృడంగా మార్చుకోవాల్సిందిగా కోరుతున్నాను" --సచిన్ తెందుల్కర్
