ఆస్కార్ వేడుక అమెరికా లాస్ ఏంజిల్స్లో అట్టహాసంగా జరిగింది. డాల్బీ థియేటర్లో నిర్వహించిన ఈ అవార్డుల ప్రదానోత్సవానికి హాలీవుడ్ ప్రముఖులు తరలివచ్చారు. మిరుమిట్లు గొలిపే కాంతులు, ఎర్ర తివాచీ అందాలు చూపరుల కళ్లను కట్టిపడేశాయి. వ్యాఖ్యాత లేకుండానే నిర్వహించిన 91వ అవార్డుల ప్రదానోత్సవం అంగరంగ వైభవంగా జరిగింది.
ఉత్తమ చిత్రం
'గ్రీన్బుక్' సినిమా ఆస్కార్ ఉత్తమ చిత్రంగా ఎంపికైంది. వాస్తవ సంఘటనల ఆధారంగా తెరకెక్కిన ఈ చిత్రం ఆస్కార్ జ్యూరీ ప్రశంసలు అందుకుంది. వర్ణ వివక్ష ఎక్కవగా ఉన్న కాలంలో నలుపు, తెలుపు వ్యక్తుల స్నేహాన్ని కళ్లకు కట్టారు. ఐదు అకాడమీ విభాగాల్లో పోటీపడిందీ చిత్రం. ఉత్తమ సహాయనటుడు, ఒరిజనల్ స్క్రీన్ప్లేతో కలిపి మూడు అవార్డులను కైవసం చేసుకుంది గ్రీన్బుక్.
ఉత్తమ దర్శకుడు: ఆల్ఫాన్సో కురానో
మెక్సికో నగరానికి దగ్గరలో కలోనియా రోమా పట్టణంలో ఉంటున్న మధ్యతరగతి కుటుంబం నేపథ్యంగా తెరకెక్కింది 'రోమా' చిత్రం. ఈ సినిమాకు దర్శకత్వం వహించిన ఆల్ఫాన్సో కురానో ఉత్తమ దర్శకుడిగా ఆస్కార్ కైవసం చేసుకున్నాడు. అత్యధికంగా ఆస్కార్కి నామినేటైన ఆంగ్లేతర చిత్రంగా 'రోమా' రికార్డు సృష్టించింది. మొత్తం 10 విభాగాల్లో అకాడమీ అవార్డులకై పోటీ పడింది.
ఉత్తమ నటుడు: రమి మాలెక్
'బ్రిటీష్ రాక్ బ్యాండ్ క్వీన్'లో లీడ్ సింగరైన ఫ్రెడ్రిక్ మెర్క్యూరీ జీవితం ఆధారంగా తెరకెక్కింది 'బొహిమియన్ రాప్సోడీ'. ఈ చిత్రంలో రమి మాలెక్ తన నటనతో విమర్శకుల ప్రశంసలు అందుకున్నాడు. ఇప్పటికే ఉత్తమ నటుడిగా గోల్డెన్ గ్లోబ్ అందుకున్న రమి మాలెక్ ఆస్కార్నీ సొంతం చేసుకున్నాడు.
ఉత్తమ నటి: ఒలివియన్ కోల్మాన్
చారిత్రక చిత్రంగా తెరకెక్కిన 'ది ఫేవరేట్' చిత్రంలో బ్రిటీష్ రాణి ఆనీ పాత్రను పోషించింది ఒలివియన్ కోల్మాన్. ఆమె నటనతో ప్రేక్షకులని అలరించిన ఒలివియన్ తొలిసారి ఆస్కార్ దక్కించుకుంది.
ఉత్తమ సహాయనటుడు: మహర్షలా అలీ
గ్రీన్బుక్ చిత్రానికి గాను మహర్షలా అలీ ఉత్తమ సహాయనటుడు పురస్కారాన్ని ముద్దాడాడు.
లేడి గాగా ఉత్తమ గాయని
ఉత్తమ ఒరిజినల్ సాంగ్ విభాగంలో లేడిగాగా ఆస్కార్ అందుకుంది. ఏ స్టార్ ఈజ్ బోర్న్ చిత్రంలోని షాలో పాటకు గానూ ఆమెకు ఈ అవార్డు దక్కింది.
