సౌదీ యువరాజు మహ్మద్ బిన్ సల్మాన్ భారత పర్యటనలో భాగంగా పలు ద్వైపాక్షిక అంశాలపై చర్చలతో పాటు కీలక ఒప్పందాలు జరిగాయి. ప్రధాని నరేంద్ర మోదీతో ఆయన భేటీ అయ్యారు.
ఉన్నత సహకార మండలి ఏర్పాటు
ఇరు దేశాల మధ్య ద్వైపాక్షిక బంధం మరింత బలోపేతం చేసుకునేందుకు సౌదీ ఆరేబియా ఉన్నత సహకార మండలి ఏర్పాటు చేయాలని నిర్ణయించారు. దీనికి సౌదీ యువరాజు మహ్మద్ బిన్ సల్మాన్, ప్రధాని నరేంద్ర మోదీ అధ్యక్షత వహిస్తారు.
వాణిజ్యం, రాజకీయ, రక్షణ సంబంధ విషయాలపై మాత్రమే కాకుండా ఇతర అంశాల్లో ఏవైనా సమస్యలు తలెత్తితే వాటిని ఈ మండలిలో చర్చించుకునే అవకాశముంది.
పెట్టుబడులు మొదట భారత్లోనే:
తాము పెట్టుబడులు పెట్టడానికి మొదట ఎంచుకునే దేశం భారతేనని సౌదీ స్పష్టం చేసింది. ఇప్పటికే భారత్లో చమురు శుద్ధి, పెట్రో కెమికల్స్, ఎరువుల సంస్థలున్నాయని పేర్కొంది.
తమ దేశంలో సంస్కరణలు ప్రవేశ పెట్టాలనుకుంటున్నామని తెలిపారు సౌదీ పెట్రోలియం మంత్రి ఖలీద్. ప్రపంచ దేశాల వృద్ధిలోనూ భాగస్వాములు కావాలని అశిస్తున్నామని ఆయన పేర్కొన్నారు.
భారత్ మరో 2-3 దశాబ్దాలలో రెండో అతి పెద్ద ఆర్థిక వ్యవస్థగా అవతరించనుంది. భారత్ మాకు వ్యూహాత్మక వ్యాపార భాగస్వామి. శక్తి వనరులు భారత్కు- సౌదీకి అనుసంధాన కర్త . మేము వ్యాపారవేత్తలం కాదు, పెట్టుబడిదారులం.
- ఖలీద్, పెట్రోలియం శాఖమంత్రి
ఇరు దేశాల సంస్థల మధ్య 15 ఒప్పందాలు
టీసీఎస్, కార్నివాల్ సినిమాస్, జెలెన్ మార్క్ సహా 15 ప్రముఖ సంస్థలు సౌదీలు పెట్టుబడులు పెట్టనున్నాయి. ఈ మేరకు ఒప్పంద పత్రాలపై సంతకాలు చేశాయి.
ఏడబ్ల్యూజే ఎనర్జీ,సెక్యూర్ ఐ, కార్నివాల్ సినిమా, రెడ్ సీ ఆరేబియా సంస్థలకు అనుమతులు జారీ చేసింది దుబాయ్ ప్రభుత్వం.
భారత్లో 100 బిలియన్ డాలర్ల పెట్టుబడులు
భారత్లో 100 బిలియన్ డాలర్లు పెట్టుబడులు పెడతామని సౌదీ యువరాజు మహ్మద్ బిన్ సల్మాన్ ప్రకటించారు. 2016 నుంచి ఇప్పటి వరకు 44 బిలియన్ డాలర్లు పెట్టుబడులు పెట్టినట్లు స్పష్టం చేశారు. ఐటీ రంగంలో భారత దేశం రోజురోజుకూ వృద్ధి కనబరుస్తోందని, సౌదీ కూడా ఈ విషయం సహకారం అందిస్తుందని ఆయన తెలిపారు .
హజ్ యాత్రికుల కోటా పెంపు:
హజ్ యాత్రికుల కోటాను మరో 25 వేలు పెంచింది సౌదీ ప్రభుత్వం. మూడు సంవత్సరాల్లో ఇది మూడో పెంపు. దీంతో ఏటా హాజ్ యాత్రకు వెళ్లే వారి సంఖ్య 2 లక్షలకు చేరింది.
