ఈ కాఫీ ప్రదర్శనశాల ఎంతో ఆసక్తికరమైనది. విలువైనది. ప్రపంచ కాఫీ ఎగుమతుల్లో ముందు వరుసలో ఉన్న వియత్నాంలో ఇప్పటివరకు కాఫీ మ్యూజియం లేదు. స్థానికులకే కాదు, ప్రపంచానికి వియత్నాం కాఫీని పరిచయం చేసేందుకు ఇది సరైన మార్గం.
- హో క్వాంగ్, మ్యూజియం సందర్శకుడు.
ఈ కాఫీ ప్రదర్శనశాల బాన్ మీ థూట్ అనే నగరంలో ఉంది. స్థానికంగా అల్పసంఖ్యాక వర్గమైన రేడ్ జాతి ఇళ్ల ఆకృతిని ఈ భవన నిర్మాణానికి ప్రేరణగా తీసుకున్నారు. ఎన్నో ఏళ్లుగా కాఫీ తోటల్లో వీరు కార్మికులుగా పనిచేస్తున్న కారణంగా ఈ శైలి నిర్మాణాన్ని ఆ జాతికి అంకితం చేశారు. వియత్నాంలోని దిగ్గజ కాఫీ తయారుదారైన లెజెండ్ సంస్థ ఈ మ్యూజియంను ఏర్పాటు చేసింది.
స్థానిక రైతుల దగ్గర నుంచి విదేశీయుల వరకు ఈ మ్యూజియంను ఎవరైనా సందర్శించొచ్చు. కాఫీ తయారీని తెలుసుకోవడమే కాక వారి అనుభవాల్ని పంచుకోవచ్చు. ప్రతివారం ఇందులో వివిధ కార్యక్రమాలు ఏర్పాటు చేస్తాం. స్థానిక వ్యవసాయదారుల మార్కెట్ను పరిచయం చేస్తుంటాం. తద్వారా కాఫీ పరిశ్రమలో జరిగే విషయాల్ని తెలియజేస్తాం.
- జియాంగ్, డిప్యూటీ డైరెక్టర్, లెజెండ్ కాఫీ గ్రూప్
మొక్క దశ నుంచి మన టేబుల్పైకి కాఫీ కప్పు వచ్చే వరకు పూర్తి తయారీ విధానాన్ని సందర్శకుల కళ్ల ముందుంచుతుంది ఈ మ్యూజియం. వివిధ దేశాలకు చెందిన సుమారు 10వేల వస్తువులు ఈ ప్రదర్శనశాలలో కనువిందు చేస్తాయి. హాంబర్గ్లోని జర్మన్ జెన్స్బర్గ్ కాఫీ మ్యూజియంలో వాడిన యంత్రాలు, టర్కీ నుంచి తెచ్చిన ప్రత్యేక కుండలు, కప్పులు వీటిలో ప్రధానంగా ఉన్నాయి. కాఫీ సాగుకు స్థానిక ప్రజలు వినియోగించే ఉపకరణాలనూ అందుబాటులో ఉంచారు.
ఈ ప్రదర్శనశాకు విచ్చేసే సందర్శకులు వివిధ కాఫీ రుచులను ఆస్వాదించే అవకాశం ఉంది. సమాచారంతో పాటు వివిధ కాఫీ సంస్కృతులను తెలుసుకోవచ్చు. సాధారణంగా కనిపించే కాఫీ వెనుక లోతైన విషయాలు అవగాహనకు వస్తాయి.
- జియాంగ్, డెప్యూటీ డైరెక్టర్, లెజెండ్ కాఫీ గ్రూప్
కాఫీ సంస్కృతుల గురించి నాకు పెద్దగా తెలియదు. స్థానికంగా దొరికే కాఫీని మాత్రమే తాగుతాను. పలు రకాల కాఫీ పద్ధతుల్ని తెలుసుకునేందుకే ఈ మ్యూజియంకి వచ్చాను.
- ట్రంగ్ కైన్, మ్యూజియం సందర్శకుడు.
ప్రదర్శనశాల మొత్తం చుట్టి వచ్చిన తరువాత కాస్త సేద తీరేందుకు ఇక్కడి కాఫీ రుచులు మనల్ని ఆహ్వానిస్తాయి.
