"ఒక్క అవకాశం"

పుల్వామా ఉగ్రదాడిపై సరైన సాక్ష్యాధారాలు ఇస్తే తక్షణ చర్యలు తీసుకుంటామని పాకిస్థాన్ ప్రధాని ఇమ్రాన్​ ఖాన్ పునరుద్ఘాటించారు. తాను మాటపై నిలబడే వ్యక్తినని తెలిపారు. శాంతికి ఒక్క అవకాశం ఇవ్వాలని భారత ప్రధానిని కోరారు.

పుల్వామా ఉగ్రదాడిపై పాకిస్థాన్​ ప్రధాన మంత్రి కార్యాలయం ఓ ప్రకటన విడుదల చేసింది. చర్యలు తీసుకోదగ్గ ఆధారాలు ఉంటే తమకు ఇవ్వాలని పేర్కొంది.

"పుల్వామా ఘటనపై సరైన ఆధారాలు అప్పగిస్తే ప్రధాని ఇమ్రాన్​ ఖాన్ ఇచ్చిన మాట ప్రకారం తక్షణ చర్యలు తీసుకుంటారు. భారత ప్రధాని మోదీ శాంతికి ఒక్క అవకాశం ఇవ్వాలి."-ప్రధాన మంత్రి కార్యాలయం, పాకిస్థాన్

మోదీ హెచ్చరిక అనంతరం...

ఇటీవల రాజస్థాన్​ ర్యాలీలో ప్రసంగిస్తూ ప్రధాని నరేంద్ర మోదీ ఉగ్రవాదంపై తీవ్రంగా స్పందించారు. గతంలో పాక్​ ప్రధాని ఇమ్రాన్​ ఖాన్ పఠానుల పుత్రుడ్ని మాట తప్పను అంటూ ఉగ్రవాద అణచివేతపై మాట ఇచ్చి తప్పారని మోదీ ప్రస్తావించారు.

"ప్రపంచం మొత్తం ఉగ్రవాదంపై ఉమ్మడిపోరుకు సిద్ధమైంది. పూర్తి సామర్థ్యంతో ఉగ్రవాదం, దానికి సాయమందిస్తోన్న దేశాలను శిక్షించడానికి ముందుకెళ్తున్నాం. ఈ సారి లెక్క సరిచేసి తీరతాం. ఇది మార్పు చెందిన భారత్​, ఇక బాధను సహించదు. ఉగ్రవాదాన్ని ఎలా అణచివేయాలో మాకు తెలుసు." - నరేంద్ర మోదీ, భారత ప్రధాని

మోదీ ఈ వ్యాఖ్యలు చేసిన మరుసటి రోజే పాకిస్థాన్​ ప్రధాని ఇమ్రాన్​ ఖాన్​ మరోసారి స్పందించడం గమనార్హం.

అంతకంటే ఏం కావాలి..?

పాక్​ ప్రధాని ఇమ్రాన్ ఖాన్​ వ్యాఖ్యలపై భారత విదేశీ మంత్రిత్వ శాఖ ఘాటుగా స్పందించింది.

"జైషే మహమ్మద్ సంస్థ, దాని నాయకుడు మసూద్​ అజార్ పాకిస్థాన్​లో ఉన్నారన్నది జగమెరిగిన సత్యం. పాకిస్థాన్​ చర్యలు తీసుకోవడానికి ఇంతకన్నా సాక్ష్యాలు ఏం కావాలి? గతంలో ముంబయి 26/11 దాడులపై పుర్తి సాక్ష్యాలను పాక్​కు ఇచ్చినప్పటికీ కేసులో ఎటువంటి చలనం లేదు. ఇది కేవలం తప్పించుకునే ప్రయత్నం మాత్రమే."- భారత విదేశీ మంత్రిత్వ శాఖ