"మా వైఖరిలో మార్పులేదు"

‘35ఎ’ అధికరణంపై సుప్రీం కోర్టులో ఉన్న పిటిషన్లకు సంబంధించి రాష్ట్రంలో ఎన్నికైన ప్రభుత్వమే ఒక వైఖరిని తీసుకుంటుందని జమ్మూ కశ్మీర్‌ పాలనా యంత్రాంగం తెలిపింది. ఇందులో ఎలాంటి మార్పు లేదని స్పష్టంచేసింది.

'ఆర్టికల్ 35-ఏ'పై తమ వైఖరిలో ఎలాంటి మార్పు లేదని జమ్మూకశ్మీర్ పాలనా యంత్రాంగం ​స్పష్టం చేసింది. ప్రజలు ఎన్నుకున్న ప్రభుత్వం మాత్రమే 'ఆర్టికల్​ 35-ఏ' నిబంధనపై సరైన నిర్ణయం తీసుకోగలదని పేర్కొంది.

జమ్మూకశ్మీర్​ ప్రజలకు ప్రత్యేక హక్కులు, అధికారాలు కల్పించే రాజ్యాంగంలోని 'ఆర్టికల్ 35-ఏ'పై సుప్రీంకోర్టులో విచారణ జరగనున్న నేపథ్యంలో పాలనా యంత్రాంగం ఈ ప్రకటన చేసింది.

"ఆర్టికల్ 35(ఏ) పై మా వైఖరిలో ఎలాంటి మార్పులేదు. సుప్రీంకోర్టులో 'ఆర్టికల్​ 35-ఏ'పై విచారణను వాయిదా వేయమని ఫిబ్రవరి 11న చేసిన అభ్యర్థనపై ఇప్పటికీ యంత్రాంగం కట్టుబడి ఉంది."_ రోహిత్​ కాన్సల్​, జమ్మూకశ్మీర్​ గవర్నర్ అధికార ప్రతినిధి

వదంతులు నమ్మి కశ్మీర్ ప్రజలు భయాందోళనలకు గురికావద్దని రోహిత్​ కాన్సల్ సూచించారు.

సుప్రీంకోర్టు ప్రధాన న్యాయమూర్తి జస్టిస్​ రంజన్ గొగొయి, జస్టిస్ సంజీవ్ ఖన్నాల ధర్మాసనం ముందు జమ్మూకశ్మీర్​ ప్రభుత్వ న్యాయవాది షోయబ్​ ఆలమ్ తన అభ్యర్థనను వినిపించారు. ఆర్టికల్​ 35(ఏ) సవాల్​ చేస్తూ వ్యాజ్యాలు దాఖలు చేసిన పార్టీలకు లేఖలు రాయడానికి ప్రభుత్వానికి అనుమతి ఇవ్వాలని అభ్యర్థించారు. ఆర్టికల్ 35(ఏ)పై విచారణను వాయిదా వేయాలని కోరారు.

పాక్​ అనవసర ప్రసంగాలు..

జమ్మూకశ్మీర్​కు స్వయంప్రతిపత్తి కల్పించే 'ఆర్టికల్​ 35-ఏ'ను సవరణ చేయడం ద్వారా జమ్మూకశ్మీర్​ ప్రజల హక్కులు హరించిపోతాయని పాక్​ ఆరోపించింది. దీని ఫలితంగా (ముస్లిం) జనాభాలో మార్పులు చోటుచేసుకుంటాయని పేర్కొంది. ఈ చర్య అంతర్జాతీయ చట్టాల ఉల్లంఘన అవుతుందని ఆరోపించింది.

ఏమిటీ 'ఆర్టికల్​ 35-ఏ'?

'ఆర్టికల్​ 35- ఏ'ను 1954 రాష్ట్రపతి ఉత్తర్వు ద్వారా రాజ్యాంగంలో పొందుపరిచారు. ఇది జమ్మూకశ్మీర్​​ స్థానిక ప్రజలకు ప్రత్యేక హక్కులు, అధికారాలు ప్రసాదిస్తుంది. ఇతర ప్రాంతాల ప్రజలు ఇక్కడి స్థిరాస్తులు ఆర్జించడానికి వీలులేకుండా నిబంధన విధించింది.

అలాగే జమ్మూకశ్మీర్​కు చెందిన మహిళ వేరొక ప్రాంత పురుషుడిని వివాహం చేసుకుంటే ఆమెకు ఉన్న ఆస్థి హక్కులు హరించిపోతాయి. ఇది ఆమె వారసులకూ వర్తిస్తుంది. అంటే వారికీ ఎలాంటి ఆస్తి హక్కులు సంక్రమించవు.

సవాల్​...

అయితే ఈ ఆర్టికల్​ 35-ఏను సవాల్​ చేస్తూ 'వుయ్ ది సిటిజన్స్​' ఎన్​జీవో సహా పలువురు సుప్రీంలో వ్యాజ్యాలు దాఖలు చేశారు.

ప్రతిసవాల్​...

ప్రతిగా నేషనల్​ కాన్ఫరెన్స్​, సీపీఎం పార్టీలు (ఆర్టికల్ 35-ఏ)ను సమర్థిస్తూ సుప్రీంను ఆశ్రయించాయి. జమ్మూకశ్మీర్​ శాసనసభ మాత్రమే 'శాశ్వత నివాసితుల'ను నిర్వచించగలదని స్పష్టం చేశాయి. రాష్ట్ర ప్రభుత్వం ఆర్టికల్​ 370 (1)(డి) ద్వారా రాష్ట్రపతి తన అధికారం ఉపయోగించి ఆర్టికల్ 35 ఏను రాజ్యాంగంలో పొందుపరిచారని పేర్కొన్నాయి. ఇందుకు 1961, 1969 సుప్రీం తీర్పులే ఆధారమని తెలిపాయి.