మనమూ అవతార్​లా మారిపోవచ్చు!

అవతార్​ లాంటి యానిమేషన్​ పాత్రల్లోకి మారటానికి వీలు కల్పిస్తోంది మోషన్​ క్యాప్చర్​ సాంకేతికత.

ఈ కొత్త టెక్నాలజీతో మనం తెరపై అవతార్​లా మారిపోవచ్చు. మనం ఏం చేస్తే అవతార్​ అలానే చేస్తుంది. ముఖ కవళికలతో సహా. ఒక్క అవతారే కాదు చాలా రకాల యానిమేషన్​ పాత్రల్లోకి పరకాయ ప్రవేశం చేయొచ్చు. ఇది మోషన్​ క్యాప్చర్​ అనే సాంకేతిక అద్భుతం. ఇందుకోసం ప్రత్యేక సాఫ్ట్​వేర్లు ఉన్నాయి. కెమెరాల సాయంతో ఇది కదలికల్ని గుర్తిస్తుంది. శరీరానికి కొన్ని పరికరాలనూ అమర్చాల్సి ఉంటుంది.

వర్చువల్​ పాత్రలతో ప్రదర్శనలు నిర్వహిస్తూ అబ్బురపరుస్తున్నాయి జపాన్​లోని కొన్ని బృందాలు. వీ ట్యూబర్స్​ పేరుతో వీరు నిర్వహిస్తున్న కాన్సర్టులకు జనాదరణ విపరీతంగా పెరిగిపోయింది. ఇది 2016లో ప్రారంభమైంది.

మోషన్​క్యాప్చర్​ సాఫ్ట్​వేర్​ల సాయంతో వర్చువల్​ పాత్రలతో ప్రదర్శనలు ఇస్తారు. వీటిని ఆన్​లైన్​లో ప్రసారం చేస్తారు. ప్రత్యక్షంగానూ చూసేందుకు టికెట్ల కోసం ఎగబడుతున్నారు జపాన్​వాసులు.

వర్చువల్​ యూట్యూబర్ల ఛానెళ్లకు ఆన్​లైన్​లో మిలియన్ల కొద్దీ సబ్​స్క్రైబర్లు పెరుగుతూనే ఉన్నారు. చాలా సంస్థలు ఈ సాఫ్ట్​వేర్​లపై పెట్టుబడులు పెట్టేందుకు ఆసక్తిగా ఉన్నాయి.

వర్చువల్​ యూట్యూబర్​ బృందాలు ఎనోగు పేరుతో జపాన్​లో ప్రఖ్యాతి పొందాయి. యూట్యూబ్​లో వీరి ఛానెళ్లకు ఆదరణ రోజురోజుకూ పెరిగిపోతోంది.