ప్రస్తుతం స్మార్ట్ఫోన్లు విరివిగా వాడుతున్నారు. చరవాణిలన్నింటిలోనూ అతిపెద్ద సమస్య బ్యాటరీ సామర్థ్యం. 3000,4000 ఎమ్ఏహెచ్ కెపాసిటీ గల బ్యాటరీలే ఓ మోస్తరుగా వాడుకోవచ్చు. అయితే త్వరలో 18,000 ఎమ్ఏహెచ్ బ్యాటరీ గల ఫోన్ రాబోతుంది. ఎనర్జైజర్ సంస్థ ఈ ఫోన్ను తీసుకువస్తుంది.
స్పెయిన బార్సిలోనాలో జరుగుతున్న మొబైల్ వరల్డ్ కాంగ్రెస్-2019లో పవర్ మ్యాక్స్ P18కే ఫోన్ను పరిచయం చేసింది ఎనర్జైజర్ సంస్థ. ఇప్పటికే ఫోల్డబుల్ ఫోన్లు, అతిపెద్ద మెమరీ కార్డులను ఇక్కడ విడదల చేశారు. తాజాగా ఈ లిస్టులో ఈ భారీ బ్యాటరీ చరవాణి చేరింది.
పవర్ మ్యాక్స్ P18కే ఫోన్ బ్యాటరీ సామర్థ్యంతో వారం రోజుల పాటు వాడుకోవచ్చు. ఏకబిగువున రెండు రోజులపాటు వీడియోలు వీక్షించవచ్చు. 18,000 ఎమ్ఏహెచ్ బ్యాటరీ సామర్థ్యం గల ఈ ఫోన్లో చార్జింగ్ ఫుల్ అవ్వడానికి 8 గంటల సమయం పడుతుంది.
6.2 అంగుళాల తెరతో ఎల్సీడీ డిస్ప్లేని కలిగిఉంది. రెండు సెల్ఫీ కెమెరాలు, వెనక వైపు మూడు కెమెరాలతో ఆండ్రాయిడ్ 9పై వర్షన్తో ఆకర్షిస్తుంది. మీడియాటెక్ ప్రాసెసర్, 6జీబీ ర్యామ్, 128 జీబీ అంతర్గత నిల్వ సామర్థ్యాన్ని కలిగిఉంది. ప్రపంచంలోనే అతిపెద్ద బ్యాటరీ సామార్థ్యం కలిగిన ఎనర్జైజర్ పవర్ మ్యాక్స్ P18కే చరవాణి వేసవిలో అందుబాటులోకి వస్తుంది.
