కొత్తగా పుట్టుకొస్తున్న టెక్​ బానిసలు

మారుతున్న ప్రపంచంతో పాటు పుట్టుకొస్తున్న టెక్​ బానిసలు లాస్​వేగాస్​లో తమ ఆవేదనను వ్యక్తం చేశారు.

టెక్నాలజీ మనిషిని సోమరిని చేయడంతో పాటు బానిసగా మార్చేస్తోంది. ఈ సమస్య ఏ ఒక్క దేశానిదో అనుకుంటే పొరపాటే. ప్రపంచవ్యాప్తంగా టెక్​ బానిసలు పుట్టుకొస్తున్నారు. లాస్​ వెగాస్​లో జరిగిన ప్రపంచ అతిపెద్ద వినియోగదారుల ఎలక్ట్రానిక్స్​ షో మగిసిన తరుణంలో ఎంతో మంది సాంకేతిక బానిసలు ఆవేదన చెందుతూ హెచ్చరికలు జారీ చేస్తున్నారు. ఆత్మహత్య అంచుల వరకు వెళ్లిన వారు ఇలా తమ గోడు వినిపిస్తున్నారు.

నేను ఇంటర్నెట్​, గేమింగ్​కు బానిసనయ్యాను. ఇదొక డిజిటల్​ ప్రేరేపణ. వీడియో గేమ్స్​, వెబ్​సైట్లు నా రోజువారీ జీవితాన్ని తిరిగి నేను అదుపు చేసుకోవాల్సినంత తీవ్ర ఇబ్బందుల్లోకి నెట్టాయి.
- టెక్​ బాధితుడు

టెక్నాలజీకి తాను ఎంతగా బానిసైపోయాడో వివరిస్తున్నాడు ఈ 27ఏళ్ల యువకుడు. వృత్తిపరంగా టెక్​ సంబంధిత పరిశ్రమలో పనిచేస్తు న్నాడు. సాంకేతికత ప్రతికూలతలు గురించి మాట్లాడితే ఎక్కడ తన ఉపాధికే నష్టం జరుగుతుందోనని భయపడుతున్నాడు.

ఇప్పుడు నేను ఈ ప్రత్యేక యాప్​ను వాడుతున్నాను. దీనికి ఉన్న ఫిల్టర్ ఆప్షన్​తో నేను ఏ వెబ్​సైట్​ను చూడాలో, దేన్ని చూడకూడదో చెప్తుంది. నా స్పాన్సర్​కు సైతం ఈ వెబ్​సైట్ల జాబితాను పంపుతుంది.
- టెక్​ బాధితుడు

సియాటెల్​ పట్టణం ఉన్నత సాంకేతికతకు ప్రధాన కేంద్రంగా మారింది. మైక్రోసాఫ్ట్​ వంటి టెక్​ దిగ్గజ కంపెనీలకు నివాసమైన ఈ నగరం ఇప్పుడు టెక్​ వ్యసనపరులుగా మారిన వారికి సహాయం అందించే ఆవాసంగా మారింది. ఈ ప్రాంతంలో ప్రత్యేక కౌన్సిలర్లు పుట్టుకొచ్చారు. 12 దఫాలుగా చికిత్స అందించేందుకు పునరావాస కేంద్రాలు ఏర్పాటయ్యాయి.

సాంకేతికత రోజురోజుకు మరింత ఆధునికమవుతోంది. అది యువతను ఎక్కువగా ప్రేరేపిస్తోంది. చిన్న వయసులోనే పిల్లలకు ఫోన్లు, డిజిటల్​ పరికరాలను తల్లిదండ్రులు అందిస్తున్నారు.
- హిలరీ కాష్, రీస్టార్ట్​ లైఫ్​ సెంటర్​ వ్యవస్థాపకురాలు.

వాషింగ్టన్​లోని రీస్టార్ట్​ లైఫ్​ అనే పునరావాస కేంద్రం దశాబ్దం క్రితం ఏర్పాటైంది. టెక్​ బానిసలుగా మారిన యువత ఇక్కడికి వస్తుంటారు.

దీని వల్ల సమస్యలు అధికమవుతున్నాయి. నిద్రలేమితో పగలు, పనివేళల్లో లేనిపోని భ్రమలకు గురవుతున్నారు. ఒంటరితనం, విద్యాభ్యాసం మానేయడం, కుంగుబాటు వీరిలో తీవ్రంగా కనిపిస్తోంది.

- హిలరీ కాష్, రీస్టార్ట్​ లైఫ్​ సెంటర్​ వ్యవస్థాపకురాలు.

ఈ 27ఏళ్ల యువకుడు వీడియో గేమ్స్​కు బానిసయ్యాడు. ఇప్పుడు కుంగుబాటు, కంగారు వంటి సమస్యలతో బాధపడుతున్నాడు. ప్రస్తుతం ఇంటర్నెట్​ అండ్​ టెక్​ అడిక్షన్​ అనే సంస్థ నుంచి చికిత్స తీసుకుంటున్నాడు.

చివరగా ఇప్పుడు నా తప్పు తెలుసుకున్నాను. నలుగురిలో కలిసిపోయి ఏ పనైనా చేయాలని అనుకుంటాను. నాకు సహాయం కావాలి. ఈ విషయంపై నా స్పాన్సర్​తోనూ వారానికి ఒక్కసారైనా మాట్లాడుతూ ఉంటాను.
- టెక్​ బాధితుడు

ప్రపంచ వ్యాప్తంగా 9శాతం యువత వీడియో గేమ్స్​కు వ్యసనపరులయ్యారని అమెరికన్​ అకాడమి అఫ్​ పిడియాట్రిక్స్ సమీక్షలో తేలింది. ​ఈ గేమింగ్​ డిజార్డర్​ను కొద్ది నెలల క్రితమే ప్రపంచ ఆరోగ్య సంస్థ తాము గుర్తించిన వ్యసనాల జాబితాలో చేర్చింది.