ప్రభుత్వాలు ఎన్ని పథకాలు తీసుకొస్తున్నా... వాటి ప్రయోజనాలు సుదూర ప్రాంతాల్లో ఉన్న కొందరు గ్రామీణులకు అందడం లేదు. ఒడిశాలో ప్రజారోగ్యం కోసం ప్రవేశపెట్టిన జనని సురక్ష యోజన, 108, 102 సేవలదీ ఇదే పరిస్థితి. ఆరోగ్య సేవల కోసం ఓ నిండు గర్భిణి ఎంతో కష్టపడి కిలోమీటరు దూరం నడవాల్సిన దుస్థితి ఏర్పడింది.
రాష్ట్రంలోని నంగల్బెంటా పంచాయతీ పరిధిలోని దెహురి గ్రామానికి రోడ్డు మార్గం లేదు. అదే గ్రామంలో నివసించే ఓ గర్భిణికి పురిటి నొప్పులు వచ్చాయి. గ్రామస్తులు 108 కు ఫోన్ చేశారు. సిగ్నల్ సమస్యతో ఫోను కూడా కలవలేదు. రోడ్డు మార్గం లేకపోవటం వల్ల ప్రైవేటు వాహనాలూ అందుబాటులో ఉండవు. కిలోమీటరుకు పైగా నడిచి వెళ్లి అక్కడ నుంచి ప్రైవేటు వాహనంలో ఆసుపత్రికి తీసుకెళ్లారు కుటుంబసభ్యులు.
ఆ మహిళ మగశిశువుకు జన్మనిచ్చింది. ప్రస్తుతం తల్లీబిడ్డలూ క్షేమంగా ఉన్నారు.