"ముమ్మాటికీ శిక్షార్హమే"

పుల్వామా దాడిని 'ఐక్యరాజ్యసమితి భద్రతా మండలి' ఖండించింది. ప్రపంచ దేశాలు భారత్​కు సహకరించాలని పిలుపునిచ్చింది.

పుల్వామా ఉగ్రదాడిని ఐక్యరాజ్యసమితి భద్రతామండలి (యూఎన్​ఎస్​సీ​) తీవ్రంగా ఖండించింది. ఈ దాడికి పాల్పడిన ఉగ్రవాదులు, వారికి సహాయ, సహకారాలు అందించినవారు ముమ్మాటికీ శిక్షార్హులేనని స్పష్టం చేసింది.

పుల్వామా ఉగ్రదాడికి పాల్పడిన 'జైష్​ ఏ మహమ్మద్​' పాక్​ ఆధారిత ఉగ్రవాద సంస్థేనని యూఎన్​ భద్రతా మండలి పేర్కొంది.

"ఐక్యరాజ్యసమితి భద్రతామండలి పుల్వామా ఉగ్రదాడిని తీవ్రంగా ఖండిస్తోంది. జమ్మూకశ్మీర్​లోని పుల్వామాలో ఫిబ్రవరి 14న జరిగిన ఆత్మాహుతిదాడిలో 40 మంది భారత సీఆర్​పీఎఫ్​ జవానులు మృతి చెందారు. మరి కొంత మంది క్షతగాత్రులయ్యారు. ఇది ఒక హేయమైన, పిరికిబంద చర్యగా పరిగణిస్తున్నాం. ఈ దాడికి బాధ్యులమని 'జైష్​ ఏ మహమ్మద్​' ఉగ్రవాద సంస్థ ప్రకటించుకుంది." - ఐక్యరాజ్యసమితి భద్రతా మండలి ప్రెస్​నోట్​

ప్రపంచ శాంతికి విఘాతం...

తీవ్రవాదం ఏ రూపంలో ఉన్నా అది అంతర్జాతీయ శాంతి భద్రతలకు తీవ్ర విఘాతం కలిగిస్తుందని యూఎన్​ఎస్​సీ పునరుద్ఘాటించింది.

"ఉగ్రవాద చర్యలకు పాల్పడేవారు, వారికి ఆర్థిక, సహాయ సహకారాలు అందిస్తోన్న సంస్థలు శిక్షార్హులు. అంతర్జాతీయ చట్టాలు, భద్రతా మండలి తీర్మానాలను అనుసరించి ప్రపంచ దేశాలు ఉగ్రవాదం నిర్మూలనకు సహకరించాలి. పుల్వామా ఉగ్రదాడి నేపథ్యంలో భారత్​కు అన్ని దేశాలు అండగా నిలవాలి" -ఐరాస భద్రతా మండలి​

ముక్త కంఠంతో...

పుల్వామా దాడికి బాధ్యులైన జైష్ ఏ మహమ్మద్​ సంస్థపై కఠిన చర్యలు చేపట్టాలని ఐరాస భద్రతా మండలి ముక్త కంఠంతో నినదించింది. ఆ సంస్థ వ్యవస్థాపకుడు అజహర్​ను అంతర్జాతీయ ఉగ్రవాదిగా గుర్తించాలని గతంలో చైనాను భారత్​ డిమాండ్ చేసినప్పటికీ సానుకూలంగా స్పందించలేదు. అయితే నిన్నటి సమావేశంలో చైనా సైతం మిగిలిన దేశాలతో గళం కలిపింది.