పాక్​తో సౌదీ ఒప్పందాలు

పాకిస్థాన్​తో సౌదీ అరేబియా 20 బిలియన్​ డాలర్ల పెట్టుబడుల ఒప్పందం కుదుర్చుకుంది.

రెండు రోజుల పాక్ పర్యటన నిమిత్తం ఇస్లామాబాద్​ చేరుకున్నారు సౌదీ యువరాజు మహ్మద్​ బిన్ సల్మాన్. పాక్​తో 20 బిలియన్​ డాలర్లు విలువైన పెట్టుబడుల ఒప్పందం కుదుర్చుకున్నారు. పుల్వామా ఘటనతో భారత్​-పాక్​ మధ్య తీవ్ర ఉద్రిక్తతలు నెలకొన్న ప్రస్తుత తరుణంలో సౌదీ యువరాజు పర్యటన విశేష ప్రాధాన్యాన్ని సంతరించుకుంది.

విద్యుత్​, పెట్రోకెమికల్​, మైనింగ్​ రంగాల్లో సహకారానికి ఇరుదేశాల మధ్య అవగాహన ఒప్పందం కుదిరింది.

పాకిస్థాన్​కు నో చెప్పలేమని... ఆ దేశం ఏది కోరితే అది ఇవ్వడానికి సిద్ధమని అన్నారు సల్మాన్​. పాకిస్థాన్​కు ఇదొక ముఖ్యమైన రోజు అని ప్రధాని ఇమ్రాన్​ ఖాన్​ హర్షం వ్యక్తం చేశారు.

పాక్​లో పర్యటన అనంతరం సౌదీ యువరాజు భారత్​కు చేరుకుంటారు. ప్రధాని నరేంద్ర మోదీ, పెట్రోలియమ్​ మంత్రి ధర్మేంద్ర ప్రధాన్​ల​తో సౌదీ యువరాజు సమావేశమవుతారు.