భారత్-పాక్ మధ్య ఉద్రిక్త పరిస్థితులు నెలకొన్న నేపథ్యంలో రెండు దేశాల మధ్య నడిచే సంఝౌతా ఎక్స్ప్రెస్ను నిలిపివేస్తున్నట్లు పాక్ అధికారులు ప్రకటించారు. ప్రభుత్వం నుంచి తదుపరి ఆదేశాలు అందేవరకు ఈ నిలిపివేత ఉత్తర్వులు అమల్లో ఉంటాయని పాకిస్థాన్ స్పష్టంచేసింది.
ఎప్పుడు ప్రయాణం:
ప్రతి సోమవారం, గురువారం పాకిస్థాన్లోని లాహోర్ నుంచి భారత్కు బయల్దేరుతుంది సంఝౌతా రైలు. గురువారం 16 ప్రయాణికులతో భారత్కు వెళ్లాల్సిన రైలును రద్దు చేస్తున్నట్లు పాక్ ప్రకటించింది. అకస్మాత్తుగా రద్దు నిర్ణయం ప్రకటనతో ప్రయాణికులు లాహోర్లోనే నిలిచిపోవాల్సి వచ్చింది.
భారత్ నుంచి యధావిధిగానే:
భారత్ నుంచి పాక్ వైపు వెళ్లే రైలు మాత్రం యధావిధిగా నడుస్తుందని రైల్వే శాఖ మంత్రి పీయూష్ గోయల్ ప్రకటించారు. బుధవారం రాత్రి 11 గంటల 20 నిమిషాలకు 27 మంది ప్రయాణికులతో దిల్లీ నుంచి బయల్దేరిందని ఇందులో 24 మంది భారతీయులు, ముగ్గురు పాకిస్థాన్ జాతీయులున్నారని ఉత్తర రైల్వే అధికారి దీపక్ కుమార్ తెలిపారు.
ఒప్పందం ప్రకారం:
1971 సిమ్లా ఒప్పందం ప్రకారం 1976 జులై 22న భారత్-పాక్ మధ్య సంఝౌతా ఎక్స్ప్రెస్ ప్రారంభమయింది. దీనిలో ఆరు స్లీపర్, మూడు ఏసీ కోచ్లు ఉన్నాయి.
