అక్రమ నగదు బదిలీ కేసులో ఇప్పటికే విచారణను ఎదుర్కొంటున్న కాంగ్రెస్ పార్టీ అధినేత రాహుల్ గాంధీ బావ రాబర్ట్ వాద్రా రేపు మరోమారు ఈడీ ముందు హాజరు కానున్నారు.
రాజస్థాన్లోని బికనేర్ భూ కుంభకోణం కేసులో వాద్రా, అతని తల్లి మౌరీన్ ఈడీ విచారణకు సహకరించాలని రాజస్థాన్ హైకోర్టు ఆదేశించింది. ఈ నేపథ్యంలో మంగళవారం జైపూర్లోని ఈడీ కార్యాలయంలో విచారణకు వారు హాజరు కానున్నారని జోనల్ అధికారి భవానీ సింగ్ తెలిపారు.
నాలుగోసారి విచారణకు వాద్రా
అక్రమ నగదు బదిలీ ఆరోపణలపై ఇప్పటికే మూడు పర్యాయాలు, 24 గంటల పాటు దిల్లీ కార్యాలయంలో వాద్రాను ప్రశ్నించింది ఈడీ. బికనేర్ భూ కుంభకోణంపై కోర్టు ఆదేశాలతో నాలుగోసారి ఈడీ ముందు హాజరు కానున్నారు వాద్రా.
అక్రమ నగదు బదిలీ నిరోధక చట్టంలో భాగంగా వాద్రా, అతని తల్లి వాంగ్మూలాన్ని నమోదు చేయనున్నట్లు అధికారులు పేర్కొన్నారు.
మూడుసార్లు సమన్లు
బికనేర్ కేసులో భాగంగా దర్యాప్తు సంస్థ వాద్రాకు మూడు సార్లు సమన్లు జారీ చేసింది. కానీ ఈడీ ముందు వాద్రా హాజరుకాలేదు. కోర్టును ఆశ్రయించారు. తమపై ఎలాంటి నిర్బంధ చర్యలు చేపట్టకుండాఆదేశించాలని వాద్రా కోర్టును కోరారు.
కేసు వివరాలు
ఇండో-పాక్ సరిహద్దు ప్రాంతంలోని బికనేర్లో 374.44 ఎకరాల భూ కేటాయింపుల్లో ఫోర్జరీ జరిగిందని బికెనేర్ తహశీల్దార్ పోలీసులకు ఫిర్యాదు చేశారు. దానిపై రాజస్థాన్ పోలీసులు ప్రాథమిక దర్యాప్తు నివేదిక (ఎఫ్ఐఆర్), ఛార్జ్షీట్స్ దాఖలు చేశారు. వాటి ఆధారంగా 2015 ఒప్పందంపై ఈడీ క్రిమినల్ కేసులు నమోదు చేసింది.
