పాక్​ను ఏకాకి చేసే ప్రయత్నాలు ముమ్మరం

పాకిస్థాన్​ను అంతర్జాతీయంగా ఏకాకిని చేసేలా దౌత్యపరమైన ప్రక్రియను ప్రారంభించింది భారత్​. విదేశాంగ శాఖ కార్యాలయంలో వివిద దేశాల దౌత్యవేత్తలతో సమావేశమైంది.

పుల్వామా ఉగ్రదాడికి పాల్పడిన తీవ్రవాద సంస్థ జైషే మహ్మద్​కు ఆశ్రయం కల్పిస్తున్న పొరుగు దేశం పాకిస్థాన్​పై చర్యలకు ఉపక్రమించింది భారత్​.​ పాకిస్థాన్​పై చర్యలు చేపట్టేలా మద్దతు కూడగట్టేందుకు వివిధ దేశాల దౌత్యవేత్తలతో విదేశాంగ కార్యాలయంలో సమావేశం ఏర్పాటు చేసింది. ఈ సమావేశానికి దాదాపు 20 దేశాల హైకమిషనర్లు, ప్రతినిధులు హాజరయ్యారు.

పాకిస్థాన్​ను అంతర్జాతీయంగా ఏకాకిని చేసేలా దౌత్యపరమైన ప్రక్రియ ప్రారంభిస్తామని ఉదయమే ప్రకటించారు ఆర్థిక మంత్రి అరుణ్​ జైట్లీ.

హాజరైన వివిధ దేశాలు

జర్మనీ, హంగేరీ, ఇటలీ, ఐరోపా సమాఖ్య​, కెనడా, బ్రిటన్​, రష్యా, ఇజ్రాయెల్​, ఆస్ట్రేలియా, జపాన్​, దక్షిణ కొరియా, స్వీడన్​, స్లోవేకియా, ఫ్రాన్స్​, స్పెయిన్​, భూటాన్, బంగ్లాదేశ్​, శ్రీలంక, అఫ్గానిస్థాన్​, నేపాల్​​ దేశాల ప్రతినిధులు భారత విదేశాంగ శాఖ ఏర్పాటు చేసిన భేటీకి హాజరయ్యారు.

అత్యంత ప్రాధాన్య దేశం హోదా రద్దు

ఉగ్రదాడి నేపథ్యంలో పాకిస్థాన్​పై తీవ్రంగా స్పందించిన భారత్​ ఇప్పటికే అత్యంత ప్రాధాన్య దేశం హోదాను రద్దు చేసింది. డబ్ల్యూటీఓ సభ్య దేశాల మధ్య కుదిరిన ఒప్పందాన్ని రద్దు చేసింది. ఫలితంగా పాకిస్థాన్​ నుంచి దిగుమతయ్యే వస్తువులపై సుంకాలు విధించే అవకాశం భారత్​కు లభించింది.