పుల్వామా దాడికి ప్రతీకారం

పుల్వామా ఘటనపై భారత్​ ప్రతీకారం తీర్చుకుంది. నిన్న ఉగ్రవాదులకు, బలగాలకు మధ్య 16 గంటల పాటు జరిగిన ఎదురుకాల్పుల్లో ముగ్గురు ముష్కరులు హతమయ్యారు. వారిలో పుల్వామా దాడి సూత్రధారులు ఉన్నట్లు అధికారులు గుర్తించారు.

పుల్వామా ఉగ్రదాడికి కీలక సూత్రధారులైన 'జైష్​ ఏ మహమ్మద్‌' కమాండర్‌ రషీద్‌ ఘాజీ, కమాండర్​ కమ్రాన్‌, మరో ఉగ్రవాది హిలాల్​ను భద్రతా దళాలు మట్టుబెట్టాయి.

ఈ ఎదురుకాల్పుల్లో ఓ ఆర్మీ మేజర్‌, ముగ్గురు జవాన్లు సహా ఒక పౌరుడు మృతిచెందారు.

దక్షిణ కశ్మీర్​లో సోమవారం 16 గంటల పాటు సుదీర్ఘ ఎన్​కౌంటర్​ జరిగింది. 'పింగ్లాన్'లో ముష్కరులున్నట్లు పోలీసుల ద్వారా సమాచారం తెలుసుకున్న సైన్యం పక్కా ప్రణాళికతో ఆ ప్రాంతాన్ని తమ అధీనంలోకి తీసుకుని తనిఖీ చేసింది.

ఆ సమయంలో జవాన్​లపైకి దాడికి తెగబడ్డారు ఉగ్రవాదులు. వెను వెంటనే స్పందించిన బలగాలు ఉగ్రమూకకు దీటుగా బదులిచ్చాయి. ఇరు వర్గాల మధ్య భీకర పోరు జరిగింది.

ఈ ఘటనలో పుల్వామా దాడి కీలక సూత్రధారులు మృతి చెందినట్లు అధికారులు వెల్లడించారు.